Galue mo lou manuia

By Aruna Lolani 21 July 2017, 12:00AM

“Ia o a’u ua to’a sefulutasi  la’u fanau, mai lava o laiti nei tamaiti ou te alu ma feavea’i solo i so’o se vaega ele’ele ou te galue ai ma le fa’anaunauta’iga ia va’ai ma ia matutua ane ia fa’ata’ita’i i a’u galuega,” Faasauala Mosi o Faleula. 

“O lo’u fa’amoemoega ia aua ne’i ola falōlō pe a āvea i latou ma tagata matutua ma fai o latou aiga.

“O la’u tala e fai so’o i la’u fanau e le mafai ona sau le isi tagata e fesoasoani i a te oe i le olaga lenei o lo’o o tatou ola ma soifua ai.

“E le mafai ona maua ni manuia pe āfai latou te nofonofo ma  fa’atalitali i se isi, ae o lou punou ifo lava o oe atia’e lou aiga e solosolo lelei ai.

Na ia fa’ailoa o se tasi o lu’i na ia ave i lana fanau o le galulue fa’amaoni i so’o se  taleni ua o latou maua.

“Ia o la’u lea tala e fai i la’u fanau, ia o latou iloa lelei ua taugatā lava le soifuaga ma ua le toe faigofie nei aso.

“Ia ola le tamaititi i le olaga ae ua iloa ola, ua iloa le itu e ao ona ave ai le fa’amuamua ae le’o le tosina i ta’aga a talavou.

“Ia to’a’aga e fa’amaoni aua o le itu pito sili lea ona taua i so’o se olaga o se tagata.

O a ni fa’afitauli e feagai ma oe le tamā i le tausiaina ai o fanau aemaise o le aiga?

“O aso o laiti le fanau na faigofie lava ona fa’atonu atu ma usita’i ae ina ua fa’asolosolo ina matutua ua amata na fai atu fa’atonuga ae ese le mea e fa’asaga ai.

“E le mafai la ona muta ai la’u fautua ma le ote, ma le fusipa’u i nisi o taimi pe ā ua fa’alogotātā lava.

“O le a le va’ai atu pe fia fa’ali’i, ia o lo’o i ai lava nai a’u metotia e fue ai, ma e le’o se fue ia o’o ai se fa’alavelave ae o le alofa.

“O le natura lea o so’o se matua e alofa i le fanau, e a’oa’o ma fa’atonu a sese fo’i ia o lae e fai mai le tusi e tu’u le sasa i le patua.

“E le fou nei faiga i fanau ma alo o le atunu’u, aua o le fa’atonuga lava lea na aumai e matua i a ita lea ua ota ola filigā ai lava e fai le aiga ia lea ua manuia ai lava.

“O la’u ia fo’i lea lu’i i tamaiti nei, a outou fia manuia, ia fa’alogo mai fautuaga lea e fai atu, e muamua mamao o matou feola i le olaga nai lo latou.

“E ala fo’i la ona sasi nisi o tupulaga ia o le leaga lava o matua, e vaivai le fa’atonu ma le otegia...ia fai atu le tamaititi e tu’u le inupia...ae lae va’ai mai e ta te le’o inupia.

“Ae le’o le fa’asa o le atali’i mai le pia ae solomua i a ita le tamā le tifa mai i taeao ma afiafi uma.

“O la’u fautuaga i matua, ia aua ne’i mapu le fa’atonu.
 

By Aruna Lolani 21 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>