O LA’U TALA FO’I

21 August 2016, 12:00AM

1. Matauina i Tala Fou fai mai ua toe faaopoopo le isi 18 tausaga mo le pagota o Lauitiiti Tualima-faatasi ai ma se faaupuga fai mai-“E le o salamo lava…..”!

E ui lava la ina faapea o lea alii ua lauiloa i lona amio leaga…….ae o le fesili taua lava-“Aisea ua faapenei ai lenei tama? Afai ua avea ma ana mea fiafia le soli o le tulafono-e le o se mea tatau la ona tatou fesili-pe ua mafua isea?

Faamata o i ai se vaega o lea faaletonu e afua mai totonu o lona siosiomaga tau lona aiga ma lona nuu? Ae a le va ma ona matua? Faapefea lana ekalesia?

Atonu e ono faapea mai nisi o le a lavea fua Foaga e le’i fai misa-ae ia manatua-o le siosiomaga  taua lava i le soifua mai o le tagata –o lona aiga lea! Tatou te alolofa uma lava i lenei tama tusa lava poo a ona uiga leaga-aua e tofu uma lava tatou ma fanau!

A faaletonu la tatou matua-e fifi ia tatou fanau! O lenei la tama ua so’o le lalolagi atoa i lona talaaga-ma poo le a lava lona leaga-o le mea moni-e ta’u ai lava ma i tatou matua!

O le vaai tino la i lenei faafitauli- e peiseai ua tatou malilie lava e tuu ai pea faapea lenei tama-e aunoa ma se tatou galuega o fai-e toe faalelei ai lona olaga! Ia manatua foi-o le tofi o le tagata soifua o le sese-ae a tatou tilotilo lelei i le pogai o le liutino tagata o le Alo Pele e toatasi o le Atua-e tasi lava lona sini-…….”

O le tagata agasala e to’atasi ia salamo! O le mea lea-afai ua fiu le tulafono ae le o mafai lava ona salamo ai lenei tama-o lona uiga-na te manaomia se vaifofo fou…! O lea la vaifofo-e le o le ita poo le faa-malaia-ae o le liua o le tagata tuai i le tagata fou-ona faatoa mafai lea ona lavea’ina le olaga leaga o lenei tama. 

O le a sou taofi? 

2. Matauina foi i Tala Fou le manaia o lu’itau a le Minisita o Faatoaga ma Faigafaiva-ina ia faasaga tupulaga e faato’a o tatou laueleele ina ia tele ni fua o faatoaga e auina atu i fafo mo le tamaoaiga o le atunuu-aemaise lava le manuia o tagata lautele. 

E leai la se tete’e i le finagalo o le Minisita-ae faapefea pe a faatino e fanau lona finagalo-ae o’o ane i se taimi mulimuli-ae ua leai ni maketi mo ia fuafuaga?

Ia manatu foi- e le o se fuafuaga fou lenei e tusa ai ma le finagalo o le Minisita-ae a tatou tilotilo i le taimi nei- faatusatusa i aso ua mavae-pe a gasolo mai Setima tetele e pei o le Matua ma le Tofua e la’u le fa’i a Samoa i fafo-faapena ma le koko ma le popo-ae ua le o toe vaaia se mea faapena i aso nei!

E ui lava la ina foliga faigata le toe lalagaina o lenei faamoemoe-ae sili atu ona faigofie le gagau o le vao ma fai faatoaga-ae o le fesili taua lava-“O i ai ni maketi e ave i ai ia oloa? O le a sou taofi?

3. Matauina foi ma le fiafia i Tala Fou nisi o alo ma fanau a le atunuu ia o le a malaga atu e aoaoina i totonu o Saina…! O nei la avanoa-sa le maua i aso ua mavae-ae o lea ua tatala mai.

O le tatalo la- afai e le o ni avanoa nei e lau maua-o le lu’itau la-talosia ia faaaoga tatau e alo ma fanau lenei avanoa-aua a manuia-o le a manuia ai foi lo tatou atunuu ma o tatou aiga uma! A toatele foi se aiga e faigaluega lelei-o se fesoasoani tele lea mo aiga ma faalavelave tau le nuu ma le Ekalesia. 

O se sao taua foi lea mo le atiina a’e lautele o Samoa-faatasi ai ma le maua o ni Ta’ita’i lelei ma le aoaoina o Samoa i le lumana’i! O le a sou taofi? 

21 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>