Taugata le Soifuaga

By Ulimasao Fata 21 November 2017, 12:00AM

O lo’o tumau pea le matagofie o Samoa vagana ai le taugata tele o le soifuaga ua iai nei.

O le talitonuga lea a le taule’ale’a ia Ah-Fook Ah-Fook 24 le matua o lona soifua mai le afioaga o Samusu I Tai I le itumalo o Aleipata.

Na maua le avanoa o le ali’i o Ah-Fook e talatalanoa ai ma le Fofoga o Samoa a’o faia pea ana galuega I le taeao ananafi.

Na fa’aalia ai e Ah-Fook na’o le pau lava le fa’afitauli o lo’o feagai nei ma le atunu’u o le taugata lea o le soifuaga.

“O lo’o manaia ma lelei mea uma I Samoa nei vagana ai le taugata tele ua iaia le soifuaga I Samoa.

“O lo’o ou faigaluega nei ma o lo’o ou nofo nei I le mea o lo’o ou faigaluega ai ma e $150 le tupe maua I le vaiaso ia ae matua le lava lena seleni I le tausiaina o le matou aiga aemaise le fa’atauina o mea ta te mana’o iai.”

Na ia saunoa foi o le mea e manuia ai o ia o le maua lea o lana avanoa e nofo ai I totonu o le mea o lo’o faigaluega ai nei.

“Ou te iloa ua lelei le tulaga lea ua ou nofo ai iinei I la’u galuega I le vaiaso atoa fa’atoa ou alu a I le matou aiga I fa’aiuga o le vaiaso ua sefe ai le seleni e alu I le totogiina o le pasese ona o le mamao.

“O le sau a ia mai le matou nu’u mo iinei e $10 lava le seleni e fa’aalu I le sau ma le alu a’o lea ua lelei lea e sefe a sina seleni ona o lea e maua le mea e nofo ai iinei.”

Na saunoa foi le ali’i ia Ah-Fook I le auala o lo’o fa’apena ona tausi ai le latou aiga mai le taugata ua iai nei le soifuaga.

“O le matou aiga lava ia e to’atolu ia a’u tagata o lo’o faigaluega ma o le vaega tonu lea o lo’o maua ai le suaseleni a le matou aiga.

“Ese mai I lena itu I galuega, o le matou aiga o lo’o fa’amoemoe foi I le Matou ma’umaga o lo’o iai nei.”

Na ia saunoa foi o le mafua’aga ua ala ai ona to’atele tagata ua fai latou pisinisi I luma lava o le auala tele ona ua faigata le soifaga.

“Ua tele lava na ou vaaia nai aiga ua fa’atutu solo tama’i pisinisi I autafa o le auala ona o le sailia pea oni seleni talu ai le faigata o le olaga ua iai nei.”

By Ulimasao Fata 21 November 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>