‘Faigata le olaga’ - Samuelu

By Ulimasao Fata 21 November 2017, 12:00AM

O le a matua faigata le olaga I le na’o le $310 le seleni e ola ai mo le lua vaiaso aemaise le tausi ina o tamaiti e to’aono.

O le talitonuga lea a le Tama ia Samuelu Faialaga e to’aono lana fanau mai le afioaga o Tanumalala. Na maua le avanoa e talatalanoa ai le Faialaga ma le Fofoga o Samoa a’o ia aga’i atu I le fale na sau e asi ona matua o lo’o nonofo ai I Nu’u Fou ma lana fanau e to’atolu o lo’o nofnofo ai aua le tausavali I aoga.

Na saunoa ai le Tama ia Samuelu Faialaga o lo’o la nonofo taumasina ai ma lona faletua I se fanua a se aiga o lo’o I Tanmalala ma o le la galuega foi lea.

“O la’u galuega lava lea o lo’o maua ai se tupe maua mo le matou aiga aua o lea e ma te nonofo taumasina I se fanua o lo’o I Tanumalala.

“E $310 la’u tupe maua mai la’u galuega mo le lua vaiaso ae pau le taimi ta te vaaia ai lea seleni o le taimi e aumai ai, ona ave ese loa lea o le tupe e totogi ai aitalafu o le vaiaso mai I faleoloa o lo’o I autafa ane o le matou fale o lo’o aitalafu ai pe a leai se tupe I le vaiaso.”

Na saunoa foi le Tama ia Samuelu Faialaga o le isi vaega tupe o lona totogi e ave lea aua le tausiaina o ona matua aemaise lana fanau aoga o lo’o nonofo fa’atasi ma ona matua.

“E uma loa ona totogi ma aitalafu o le vaiaso ona totoe lea o le tupe e ave sa’o a I nai o’u matua ia fa’atasi ai ma le fanau aoga o lo’o latou nonofo fa’atasi ai I Nu’u Fou.

“Ia pei foi ona tatou feiloa’i ai nei o lea fa’atoa ou foi mai I le fale a o’u matua na ou alu atu iai e avatu iai le seleni aua le fanau aoga ia aemaise foi se laua meaai.”

Na ia fa’aalia ai I le Fofoga o Samoa o le olaga nei ua matua faigata lava ae o lo’o ia taumafai lava I le mea e gata ai le mafai aua le tausiaina lea o lona aiga.

“Ua faigata lava le olaga I lenei vaitau pe a fua atu I le tupe e te mauaina ma le mea e alu ai le fa’asoa ona ua faigata lava ua tupe uma mea uma I Samoa nei.

“O lo’o ou taumafai nei I le mea lava e gata ai le mafai ina ia tausiaina le matou aiga ona e leai lava ma se isi mea e mafai ona fai nai lo’o le galue aua le tausiina o le aiga.

Na ia fa’aalia foi pau le fa’afitauli o lo’o feagai nei ma ia ma le aiga o le tala o le seleni ona e le tele se seleni mai lana galuega.

“Ua faigata tele lava le olaga I le nei vaitau ona ua tupe uma mea uma le pei o la aso e mafai lava ona fesuia’i oloa ae le fa’aaogaina ai ni tupe.”

By Ulimasao Fata 21 November 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>