O LA’U TALA FO’I

201 Hits

1. Matauina i Tala Fou se ulutala fai mai-‘o loo lumana’i ai ni aso pogisa-ma o lea ulutala e faasino i tagata faipisinisi ma tagata fai fale’aiga ia na faatama’ia uma a latou meatotino-i le afi na afaina ai le Flea Maketi. O le uiga la o lea faaupuga-o pisinisi nei ma fale’aiga-sa tua i ai le tausiga o latou aiga ma le faa-aogaina o le fanau-ae o lenei ua liu efuefu mea uma. Ona o lea la itu-sa feiloa’i ia tagata faipisinisi ma le Ofisa Sili o Pulega o le Faalapotopotoga o Eleele a Samoa poo le SLC -i le Maketi i Vaitele-ma e faapea sa folafola ane i le aufaipisinisi-o loo tilotilo le Malo i ni faiga e maua ai se fesoasoani mo i latou. Fai mai e latalata i le 300 tagata faipisinisi sa i le Flea Maketi-ia ua matua liu efuefu a latou mea uma. Fai mai ua faateleina le popole o i latou- ona o lea o le a a’e aoga a le fanau-ma ua aliali mai le tulaga faaletonu-o a latou fanau! Ia-afai la sa galulue ia tagata faipisinisi o le atunuu mo le manuia o latou aiga-e le taumateina foi le tele o lo latou sao i le tamaoaiga o le atunuu e ala i le totogi o le VAGST pe a latou faatauina oloa ma taumafa mo a latou pisinisi! O lona uiga la- e tatau foi ona latou maua se fesoasoani mai le Malo! O le a sou taofi?

2. Ua matauina foi i Tala Fou-fai mai ua una’ia e le Taitai o le Tautua Samoa Party-o Palusalue Faapo II le Malo- ina ia faaaoga le tupe na aiaia i totonu o le Tala o le Tupe mo Tupe Alu e le’i Faatatauina-e fesoasoani ai i tagata faipisinisi na afaina i le afi. O le aofai o lea vaega-tupe e $14 miliona-lea o loo i totonu o le Tala o le Tupe o le 2015/2016-e tusa ai ma le faaaliga a Palusalue. O le Talanoaga la ma Tusitala o Tala Fou o Nusipepa na faaalia ai e Palusalue-e tatau ona aloa’ia e le malo le sao o ia pisinisi laiti i le atiina a’e o Samoa-ma o sea gaoioiga- e tatau ona faatino i se taimi vave. O le mau a Palusalue-o tupe alu e le’i faatatauina o loo i totonu o le Tala o le Tupe-ma o tupe alu tonu ia- mo taimi faapenei. Fai mai la Palusalue-I le 2009-o tupe foi ia sa tuuina atu ai fesoasoani i tagata na afaina i le Tsunami. O le fautuaga la a Palusalue-o tupe ia atonu e mafai ona faaune atu i tagata faipisinisi i se tului  e aupito i maulalo! Ia afai o le finagalo lea o Palusalue-o lona uiga-o loo i ai lava tupe e mafai ai ona fesoasoani atu ai le Malo i tagata faipisinisi o le atunuu ua pagatia! O le a sou taofi?

Matauina foi i Tala Fou se tamā mai Samoa na ia fasi faamo’amo’a lona atalii pepe-ma gaui ai ni ona ivi ‘aso’aso se lua ma isi vaega o lona tino-ae ua faataga ona nofo i Niu Sila ina ia mafai ai ona toe faaleleia lana amio. O lea alii o Romeo Misipati mai Samoa-na tuuina atu i le falepuipui mo le lua tausaga ia Aperila 2014-ona o ni manu’a na ia faia i lona atalii la’ititi. O Misipati na nofo i Niu Sila talu mai le 2009-na tatala i tua mai le falepuipui ia Me o le tausaga talu ai-ina ua uma ona tuli le ‘afa o lona faasalaga. Na maua e le Vaega Tau Femalagaiga ma le Puipuiga-e lava ma toetoe le lagolago a le atunuu e faataga ai o ia e nonofo pea i Niu Sila ma lona aiga –ma e talitonu foi-o le toe faafo’i atu i lona atunuu e le o se mea lea e manuia ai lana fanau. E tatau ona aloa’ia le itu e faapea-ua uma ona tuli e Misipati lona faasalaga-ona o le le pulea o lona ita. O le aiaiga la e faapea- a toe falepuipui Misipati ona o se isi solitulafono i totonu o le isi lima tausaga-o le a tipoti loa o ia i lona atunuu. O le fautuaga la a le MInisita o le Toe Fuata’ina o Ms Collins- e le o se mea faigata ona fai o se isi moliaga-ae tatau ona sui le tulafono e faatino ai….! Ia-afai o se alii Samoa moni lenei alii- e faigata ona talitonu e mafai e se tamā Samoa ona fasi faapenei sona atalii ‘alu’alutoto! Ae faamata o le a le pogai? Sa faita lava o tagata Samoa o loo i fafo latou te faia le faaa’oa’oga moni o le alofa i fanau! Ia afai ua maua le avanoa e nofo ai i Niu Sila-ae toe lavelavea i nei solitulafono-e faapefea la ona toe alu i Niu Sila?O le mea lea e igoa o le maua o le ‘ula futifuti-ae le ula faalelei ma faaaoga le taimi na alu atu ai mo le manuia o le aiga lea e faatali atu i Samoa nei! O le a sou taofi?

© Samoa Observer 2016

Developed by Samoa Observer in Apia