Fuafuaga a le Palemia e fa’amuta ai misa a A’oga

By Lanuola Tusani Tupufia 23 May 2016, 12:00AM

E lē-fa’apa’ole le finagalo o le Ali’i Palemia, Tuila’epa Sa’ilele Malielegaoi, e tapunia sa’o lava so’o se a’oga a le malo e fa’atupu-vevesi ma fa’aauau ona fa’atupu-misa tamaiti e a’o’oga ai.

E le gata i lea, a ua a’e fo’i se tofa a lana afioga, e fuafua lelei ai le fa’amatu’uina atu o fesoasoani tau-tupe i a’oga a ekalesia ma a’oga tuma’oti.

O le fa’amalamalamaina o lona finagalo, na ta’utino ai e Tuila’epa le tapunia o so’o se a’oga e fa’aauau pea ona a’afia i misa ma vevesi fai-so’o i nofoaga faitele. 

E matua maumaututu le fa’ai’uga na fai a le Kepeneta ina ua tapunia le-tumau le Kolisi o Avele mo le lua vaiaso, ona o fa’amata’u na faia e nisi tamaiti-a’oga i luga o feso’ota’iga i upega-tafa’iLagi, na ta’ua ai le osofa’ia o tamaiti-a’oga, faia’oga ma le Kolisi o Maluafou. 

Na fa’atoa toe tatala le a’oga lea i le amataga o le vaiaso talu ai.

 “Manaia tele le mea lea; a to’a’aga lava e fufusu ma fa’atupu vevesi, o le a fa’apena lava ona matou tapunia o a’oga,” o lana saunoaga lea.

“Ona pau lava lena o le mea latou te maua aua e ala ona tupu vevesi nei, ona leai o le leai o se a’oa’iga mai matua. Pau lea o le mea faigofie, o le tapuni o le a’oga.”

Moni e faigata i le malo ona tapunia o a’oga a ekalesia pe a fa’atupu-vevesi, ae na saunoa le Ali’i Palemia, e leai se fa’afitauli o lena mea.

Ua iai fo’i le fuafuaga, e o’o lava i fesoasoani tau-tupe a le malo mo a’oga a ekalesia, o le a taofia.

“E le aiaina e le malo, a’oga a ekalesia,” o lana saunoaga lea. “A ua sui le faiga o le a fai ai le tufatufaina atu o fesoasoani tau-tupe nei. O le a le toe tu’uina atu i le ‘au-lapopo’a lea e na ona nofonofo i totonu ma fai le fa’asoa. O le a alu sa’o lava i a’oga, ma o le taimi lava e fufusu ai ma fa’atupu misa, e leai se tupe e toe avea iai.”    

Na fa’aopoopo mai fo’i, o le taofia o seleni nei mai le malo pe a a’afia so’o i misa ma fa’avevesi, e i’u ai lava ina tapunia a’oga nei aua ua leai se tupe. 

“Afai la o fa’afofoga mai matua, ua tatau ona mafaufau e ‘avea a latou fanau i a’oga tulagalua ma kolisi i totonu lava o o latou nu’u ma itumalo.”

By Lanuola Tusani Tupufia 23 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>