Sa matua mana’o tele le ‘iole   i ‘apa’au o le pe’a. Ona nofo lea o le ‘iole ma mafaufau i se togafiti na te maua ai apa’au o le pe’a, ae faigata ona o le pe’a e lele i lugā, a’o le iole e tolotolo i lalo i le eleele.

Ona vaava’ai lava lea o le iole i se fuala’au e mana’o tele i ai le pe’a. Ona vaai atu lea o le iole e matua mana’o tele le pe’a i le fua o le gatae, o le aloalo foi le isi igoa. Ona o’o lea i le isi aso, ua vaai atu le iole o tautau mai le pe’a i le fua o le aloalo. 

Ona faapea lea o le manatu o le iole-e lelei ona ‘ou a’e i le mea o loo i ai le pe’a. Ona alu lea o le iole i le pe’a; ua o’o i luga ona valaau atu lea o le iole i le pe’a, ae lele le pe’a ua tautau mai le ifi.

O le tasi lena o la’au e mana’o i ai le pe’a i lona fua. Ona toe alu foi lea o le iole-ua toe a’e i le ifi o loo tautau ai le pe’a, e vaai ifo le pe’a o alu atu le iole, ona tau sola lea, ae vala’au atu le iole: Aua e te sola  aua e lē o sou laau le laau nei- o lo’u la’au, ae faatali mai ia te a’u; aua e te sola, ae se’i o ta talatala. Ona tali mai lea o le pe’a-Ua lelei, o le a ‘ou faatali atu, ae o a a ta tala e fai? 

Ona fai atu lea o le iole: Alii Pe’a, o le a ‘ea le mea ua e ‘ai ai fua o lo’u la’au? Tali le pe’a: Iole e, ia e faamolemole, e moni a oe. Tali le iole: E tasi le mea e lelei ai lo’u loto, ou te le ita ai ia te oe, seiloga lava ta te faa-uo; ou te le tulia foi oe pe’a pe a e sau i le laau nei  e te ‘ai ai. Ona fai atu lea o le pe’a: Alii e, ua lelei-o le a fai le ta faiga-uo.

Ona fai atu lea o le iole: Alii e Pe’a, e te lili’a ‘ea pe a e lele i lugā, aua ta te vaai atu e matua maualuga lava le mea e te lele ai? Tali le pe’a-Alii e iole, ou te le lili’a. Oi e moni Pe’a? O le fesili lea a le iole.

Tali le Pe’a-‘ou te le lili’a. Ona fai atu lea o le iole-Pe’a e, ia e alofa mai ia te a’u-aumai ou apa’au se’i o’u faata’ita’i ai-ina ia iloa ai lou faamaoni, ma o lenei foi ua fai le ta faiga-uo!.

Ona tali atu lea o le Pe’a ua lelei; o le a avatu o’u apa’au e te faata’ita’i ai, ona e iloa ai lea e matua lelei lava le mea ou te fealua’i ai. Toe fai atu le Pe’a-Alii e, a e alu, aua e te alu mamao. Tali le iole: E leai-e na ona ‘ou lele ai i le laau lale e tu mai, ona ‘ou toe sau vave ai lea avatu ou apa’au, se’i e ‘ai atili ai ia e maona. 

Ona tago atu lea o le Pe’a i ona apa’au, ua aumai ua teu i lona tino, a ua fai atu le iole i le Pe’a-Alii e Pe’a, ia e faamolemole, se’i tuu atu a’u mea ia e te faatali atu ma oe, leaga e faalavelave pe a ‘ou alu.

Ona tu’u lea i le Pe’a o le si’usi’u ma vae e fa o le iole. Ona tago lea o le Pe’a ua faamaulu foi le si’usi’u i lona tulai’u. Ona toe fai atu lea o le Pe’a: Alii e, ia e vave mai ne’i o’u tuai.Tali le iole-Ou te vave sau ae nofo oe iina ma ‘ai ia e maona. Ona lele loa lea o le iole, ae o le Pe’a ua na o le ‘ai lava ma vaavaai i le lele atu a le iole- a ua le toe foi mai. Ona tagi lea o le Pe’a ma faapea ana upu-‘Aue a’u e ua faamao e le iole-ua sola ma o’u apa’au. 

O le tala lenei o le Pe’a sa lele i ona apa’au a’o lea ua nofo i le eleele; a’o le iole ua ta’u nei o le Pe’a. E i ai le muagagana a Failauga e faasino i le faiga-uo a le Pe’a ma le Isumu’ (Edited Fui).

O le Tala i le Namu

Na sau le folauga a le ulugalii e to’alua mai le Atu Sasa’e, o Toiē ma Toipata, ma aumai pūpū e lua i lo la vaa. Ona valaau ane lea o le teine i Aunuu e afe le vaa i uta.

Ona afe lea o le vaa. Ona fai atu lea o le teine o Taunuu: O le a se oso o i lou lua vaa? Ona fai mai lea o Toie ma Toipata-E leai se mea lelei o lenei malaga ua na o pūpū e lua. Ona fai atu lea o Taunuu: ‘Aumai se pūpū e tasi ma a’u. Ona tuu atu leaiI ai o le isi pupu, ae aumai le isi pupu lulu solo i Upolu ma Savaii.

O le pogai lea o le maua o le namu i Samoa, ma ua tuputele lona tiga ona o lea ulugaliii, ua tupu tele le namu ma ua afaina ai Samoa. Ona iloa lea e Toie ma Toipata o le a fasioti i la’ua, ona faae’e loa lea o lo la vaa mai Savaii ma sosola atu i Tutuila ona o le a fasioti i la’ua talu ai le namu. Na la taunuu i Aunuu ma ua liu-maa ai.