A ‘avea tagata e aupito sili ona pele ia te oe ma mafua’aga o lou ola finau i le olaga nei, o le’a leai lava se mea na te taofia lou taumafai ina ia manuia ai lou aiga. 

E mafai fo’i lava ona a’ea mauga ina ia ola fiafia ma ola manuia lou aiga. 

E talitonu fo’i e le tau natia le tulaga ile faigata ole olaga o lo’o soifua ma ola ai tagata Samoa i lenei vaitau. 

Ae peitai, o le ola galue ma le lē fa’alogologotiga, e ea ai le pologa ma sapi ai a tatou fanau I manuia. 

O le manatu na o le tinā ia Teuila Fa’asalafa mai le alalafaga o Lotopa ina ua afea e le Fofoga o Samoa i le aso ananafi. 

O le tinā ia Teuila e 28 ona tausaga ma e to’alima ona alo. O Teuila o lo’o fa’atau ana niu ma fuala’auaina i autafa o le auala i Lotopa. 

Faimai a ia, “E le’o toe natia le tulaga ile faigata ole olaga o lo’o tatou ola ai nei, ae peita’i, a tatou nofonofo ma fa’apalapala, ona atili ai lea ona tatou pologa,” o lana fa’aaliga lea i le Fofoga o Samoa. 

“A le alu lava le tagata e galue ma sa’ili auala e maua ai se tupe e tausi ai lana fanau ma lona aiga, e le manuia foi lona aiga. 

“E le fa’apea a leai loa se galuega ona nofonofo loa lea ma fa’atalitali e alu atu se isi e avatu se tupe e tausi ai lau fanau. E tau le fa’alagolago fua i isi tagata e maua ai mai se tupe. 

“E tu lava le tagata ia i ona vae auā se manuia o lana fanau ma lona aiga.”

Na ia ta’ua fo’i, e iai lava le taimi e malolo ai matua ma selesele i galuega a fanau pe afai e lelei ona tausia fanau ma una’i ile aoga.

“O le tiute a ia o le matua o le tausi ma fa’aa’ooga fanau auā o i latou o meaalofa mai le Atua ma o i latou foi ia e faalagolago iai manuia o aiga, nu’u ma Ekalesia.

“A manuia aoga a fanau, ona selesele lea o matua ma manuia ai aiga.”

Na fa’aalia foi e Teuila, e ui ina manatu isi e faigata le galuega o lo’o ia faia, ae peita’i o le taui na te maua mai i lana galuega i aso ta’itasi e suamalie tele. 

O lana fa’aaliga fo’i ua atoa nei le tausaga talu ona fa’atau ana oloa i autafa o le auala 

“O le mafua’aga a alai ona ou sau e fa’atau niu ma isi fuala’au aina iinei, ona e maua mai ai seleni e fesoasoani i le fa’aa’oogaina o la’u fanau aemaise fo’i le tausiga o si ou aiga.

“E sili atu fo’i lea auā e maua lava le tupe i aso uma, le pei o tagata faigaluega e ta’i lua vaiaso ma maua o latou totogi. 

“O le telē lava o le tupe out e maua i le aso e $100 mai le fa’atauina o niu ma fualaau aina pei o le isaraelu ma isi.”

Na’o le pau lava le fa’anaunautaiga o le tina ia Teuila, ina ia manuia lana fanau ma maua ni o latou lumana’i lelei. 

“Pau lava lena o le mea o lo’o naunau iai lo’u loto, ia i’u lelei aoga a la’u fanau ma ia ola manuia.

“E telē se latou fo’i ia fesoasoani pe a i’u a latou aoga, ae mo le taimi nei, o le tiute lava lea o le matua o le vaai lelei o fanau ma una’i I le aoga.”

O le isi tulaga na ta’ua e Teuila o lo’o atugalu ai i le soifuaga o Samoa i le vaitau lenei, o le anoanoa’i lea o le au-faipisinisi mai atunu’u i fafo, aemaise lava mai Saina ua omai ma fa’atu a latou pisinisi i Samoa. 

“Ua tele le au Saina ma isi atunu’u ua omai ma fai a latou pisinisi i Samoa. Ma ia te au lava ia, se tasi lenei o fa’afitauli e ono a’afia ai a tatou fanau i le lumana’i pe afai ai fa’aauau pea le gasolo mai o tagata mai fafo i isi atunu’u ma fa’atu a latou pisinisi i Samoa.”