E tofu lava le tagata ma se miti e momo’o iai lona loto.

O nisi e amata mai lava a’o laiti.

E ola fo’i la, ma fai uma fuafuaga ina ia fa’ataunu’uina ia miti. 

O lea fo’i le fa’anaunauta’iga o le taule’ale’a ia Junior Paulepule. 

O ia o se taule’ale’a e 18 mai le afioaga o Samatau.

Na ia fa’ailoa ma i le Fofoga o Samoa, o lona fa’anaunauta’iga ina ia ave o ia ma faifeau i le lumana’i.

“Ua leva tele ona ou momo’o ia avea a’u ma faifeau,” o le fa’aaliga lea a Junior. 

“Ou te iloa e to’atele i latou ua fa’apea mai e le faigofie le ofoina atu o le ola e auauna ai mo le galuega a le Atua, ae o a’u, o le galuega lea o lo’o fa’anaunau lava iai lo’u loto.

“O le ala foi lea e taumafai ai lava ina ia amio lelei ma aloalo ese mai i mea leaga.”

Ae peita’i, na ta’ua e Junior, o lo’o iai lava se tasi o tulaga o lo’o ia fia faia muamua lava a’o le’i aga’i atu e fa’ataunu’uina lana miti.

“Ia te a’u ia, o le tulaga o lo’o ave iai la’u fa’amuamua i le taimi nei o le tausiga lea o lo’u aiga. 

“Ou te mana’o ia ou alu e fa’ataunu’u la’u miti ae o lo’o ua tulaga lelei si o matou aiga.”

O le tausaga mulimuli lenei o le taule’ale’a ia Junior i le Kolisi. Ma o lona fa’anaunauta’iga, ina ia maua sona avanoa i le Iunivesite Aoao o Samoa.

“O le isi tulaga o lo’o tulimata’ia e la’u va’ai, o le fia maua lea o sa’u sikolasipi e fa’alautele ai le mafaufau ina ia mafai ai ona maua se galuega e tausi ai si o matou aiga.

“Ou te mana’o e mautu uma mea mo si o matou aiga ae ou te le’i taumafai atu mo le Kolisi Fa’afaifeau i Malua.”

E le gata i lea, na ta’ua foi e Junior, a’o fa’atalitali ai mo le toe amatalia o aoga i lenei tausaga, o lo’o fa’aaogaina tatau lelei lona taimi e fai ai feau a lo latou aiga.

“O lo’o fai lava nai fe’au i le taimi nei e fesoasoani ai i aiga, aua e toe a’e loa foi aoga, ua tau leai loa se taimi mo aiga.

“E pei o le fagota lava o lo’o alu iai le taimi. E mau fagogota fa’atasi lava ma nisi o uso mai si o matou nu’u. 

“A maua mai a matou i’a, ona fa’atau lea o nisi ae ave isi e fai ai le meaai a si o matou aiga.

“A fa’atau la i’a e maua lava le $300 i le aso a leai e $150 pe a la’ititi lava le faiva.”

Na ta’ua foi e Junior, o lo’o ave lava lana fa’amuamua i le tausiaina o lona aiga ma le ofo atoa lea o lona malosi e tautua ai ona matua.

“Ua tatou iloa uma lava le faigata na ui mai ai nai o tatou matua ina ia maua ni o tatou lumana’i manuia. Ma ia te au ia, e sili lava le galue malosi ina ia mafai ona taui atu le agalelei ma le alofa o nai matua.

“E leai se mea e faigata ai pe a fa’amoemoe i le Atua ma to’aga e tatalo. Fai mai foi le isi upu, o le mea e iai le loto, e iai foi le auala e faia ai.

“O le tulaga la lea, o lo’u fa’amoemoe atoa mo le lumana’i ua lafoa’i atu i le Atua.”