O faigata e una’ia ai le ola galue

By Deidre Fanene 24 January 2017, 12:00AM

O le upu masani lava a le atunu’u, e leai lava se mea e maua ma le filemu.

O lea le finagalo o le tina ia Sose Filipo mai la afioaga o Satapuala. 

O Sose e 47 le matua o ona tausaga, ma e fai lana tama’i maketi fa’afesaga’i ma le malaeva’alele i Faleolo e fa’atau ai ana niu.

Na maua atu e le Fofoga o Samoa, o lo’o fesoasoani iai lona alo ia Pogai Filipo.

“O le natura a lea o so’o tina alofa, o le faia lea o so’o se mea e maua mai ai se manuia mo lona aiga ma lana fanau.

“O le fa’anaunauta’iga o lo’o ia te a’u, ina ia fa’ailoa atu i la’u fanau, e leai lava se mea e maua ma se filemu.

“Ou te mana’o foi, ina ia o latou lagona le faigata o le ola fa’alagolago i isi. Ae ia o latou iloa, a e fia maua manuia, e mo’omia lava lou galue punoua’i.

“Aua o nei aso, ua le toe faigofie lava.”

Na fesilligia foi le tina ia Sose mo sona finagalo i le tau o le soifuaga ua iai i lenei vaitau, ma na ia ta’ua ai, ua matua’i taugata lava le soifuaga i lenei vaitau.

“O le mea lea ua iai le tau o oloa i lenei vaitau ua pei o loketi e faga i luga o le vanimonimo le alu i luga o le tau o oloa.

“Ae ua le talafeagai lea ma le tupe maua a tagata o le atunu’u.

“O le ala lena ua faigata ai le olaga i nei vaitau. Ua taugata tele le soifuaga, ae ua la’ititi le tupe e maua e tagata.

“O le tulaga na o lea ua faigata ai le olaga i nei vaitau i la’u maitau atu iai.

“Ae peita’i e leai lava se mea e mafai aua o le finagalo lava lea o le malo. 

“Na pau lava lea, na’o le faitio lava, ae leai se mea e mafai ona fai iai, aemaise foi e le’o toe iai se vaega e agaia le malo.”

Na ta’ua foi e Sose, e feoloolo lava si seleni na te maua mai i le fa’atauina o ana oloa i tafatafa o le auala.

“E sili atu lea mo a’u nai lo’o le faigaluega i le ofisa. Mo tagata e faigaluega i le ofisa, e fa’atalitali lava se’i oo i le vaiaso totogi ona fa’ato’a maua loa lea o se tupe.

“Ae o a’u, e maua lava le tupe i aso uma. A lelei lava ma to’atele tagata fa’atau, ua maua le $200 i le aso.

“Ae a tuai foi le alu ale oloa, ua la’ititi foi le tupe e maua.

“O tupe uma la ia, e fa’aalu i mea e fai i totonu o aiga aemaise o le fa’aaoogaina o le fanau.

“Ae le gata i lea, o mea e fai i totonu o nu’u ae maise o ekalesia.”

By Deidre Fanene 24 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>