Se amataga fou mo le Lakapi a Samoa

24 February 2016, 12:00AM

Fa’aliliu e Maiava

 

Ua iai nei se sui fou a Samoa mo le Iuni Lakapi a le Itulagi (FORU).

 O le Ali’i Loia lea o Matafeo George Latu, ua suia ai Lefau Harry Schuster.

O lea fa’ai’uga na faia i le fono a le Komiti Fa’afoe o le Iuni Lakapi a Samoa, i le Aso Faraile talu ai, ma sa fa’alauiloa aloa’ia ai i le Itulagi i le afiafi ananafi.

Na fa’afetaia e le Ta’ita’ifono o le Iuni Lakapi a Samoa, o le Palemia fo’i o le atunu’u, o Tuila’epa Sa’ilele Malielegaoi lea tofiga mo le fa’aauauina pea o suiga fou o lo’o fa’agasolo mo le Iuni Lakapi a le atunu’u. 

“Ua leva ona fa’agasolo suiga fou nei ua talafeagi ona faia mo le Iuni Lakapi a Samoa, e aofia ai le faia o lenei fa’ai’uga ma se suiga lelei mo le aga’i i luma,” o lana fa’aalia lea.  

 “Ua silia i le 12 masina talu ona tofia o se Ofisa Sili fou e ta’ita’ia le tele o suitga mo’omia e fa’amautuina ai pea le malosi o le Iuni Lakapi a Samoa, e le gata i totonu a’o tua fo’i o le malae-ta’alo, ae aupito sili ai ona taua faiga malamalama ma iai le talitonuga ma le fa’atuatuaga o le aoao o Samoa i galuega fa’atino mo le lelei o le lakapi a le atunu’u. 

 “Ua iai suiga fou ua matou faia i le vaega mo koleniga i le tausaga ua mavae ma e talitonu ua i se tulaga lelei e mafai ai ona atina’e tama-ta’a’alo lelei i le lotoifale lava o Samoa, ma avatu ai fo’i le talitonu o a tatou tama-ta’a’alo fa’aporofesa i fafo, i le mafai ma le tulaga lelei e ofoina atu e le Iuni Lakapi mo latou. 

“Ua iai nei fo’i nisi o suiga fou i totonu o le Komiti Fa’afoe ma ua tu’uina atu fo’i iai le fa’atuatuaga e ta’ita’ia ai tatou i tulaga maualuluga i le Vaega o Iuni Lakapi a le Lalolagi i lenei Itulagi.  

 “O Matafeo, lea o lo’o avea nei ma Failautusi o le Iuni Lakapi a Samoa, o se tasi sa ta’alo fa’ava-o-malo mo Samoa ma Tonga ma o se tasi o loia iloga i le atunu’u, sa tautua fo’i o se Ofisa o Fa’amasino mo le Pulega o Lakapi a le Lalolagi. 

“’Ou te fa’amalo atu ai ona o lona tofiga fou ma ‘ou te iloa lelei, o le a tele sona sao aoga e avea ai ma sui o le Iuni Lakapi a Samoa i tulaga maualuluga o lakapi i le lalolagi.

“Matou te talitonu, o le a ia talia lelei ma lagolagoina lenei fa’ai’uga aua se manuia o le atunu’u ma le Iuni Lakapi a Samoa ma ona o lena fa’amoemoe, ua matou fa’atuina atu ai Matafeo e avea ma Peresetene o le Iuni Lakapi a le Itulagi pe a fai le palota i se taimi o le tausaga nei. 

 “Avea fo’i o lenei avanoa ‘ou te momoli atu ai le fa’afetai tele i le Peresetene o le Iuni Lakapi a le Itulagi talu ai nei, o ia fo’i sa avea ma sui o Samoa, le Afioga a Lefau Harry Schuster, ona o lona sao taua ma le galuega ma’elega a’o tautua ai i ia tofiga. 

“O Lefau lea sa tu i le foe a’o feagai le Iuni Lakapi a Samoa ma le tele o lu’itau ma e momoli ai le fa’afetai tele ona o lana ta’ita’iga ma lona sao aoga i ia taimi.” 

O le Aso 19 ma le 20 o Aperila 2016, e usuia ai le Fono Fa’aleTausaga a le Iuni Lakapi a le Itulagi i Nukualofa i Tonga.

O Matafeo George Latu – ua 51 tausaga o le soifua, o se tama-ta’alo fa’ava-o-malo na ta’alo fa’asefulu-lua i ta’aloga faitaulia a Samoa e aofia ai le Ipu a le Lalolagi i le 1995, ae fa’aono ona ta’alo mo Tonga.

Na fa’au’u mai le Iunivesete o Canterbury ma le fa’ailoga tikeri fa’aLoia ma sa avea o se Ofisa o Fa’amasinoga a le Iuni Lakapi a le Lalolagi. O se pa’aga faiPisinisi mo le Kamupani a le Latu Lawyers, ma sa ta’alo fo’i le ‘Au-fa’aItumalo a Canterbury a’o iai i Niu Sila. 

O se sui-tuai sa ta’alo ma galue e fesoasoani i le Kalapu Lakapi a le afio’aga o Vaimoso ma avea ai o le Pule o le Au Fa’aItumalo a le Iuni Lakapi a Apia i Sisifo. 

O Matafeo, o se Tiakono o le Ekalesia a le Apia Harvest Center.

 

24 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>