Taimi e A’oa’i ai

By Maiava 24 March 2016, 12:00AM

Toe mafaufau tasi lava… I se ali’i-leoleo na faia se lafoga fa’apea: “O le fa’ateteleina o misa’aga ma le fa’aleaga-mea o fanau i nei aso, e tupu ai se manatu, o le mea ea e iai ni tamā o nei tamaiti.” O le tuneva o le po i le isi afiafi, na a’afia ai se tasi ali’i-talavou i se soliga-tulafono matuia, ma alu loa iai lona tama e va’ai i le ofisa o leoleo, ma lona le-fiafia tele, ona ua taofia ai ma lana ta’avale e fai ma molimau. Na fa’ate’ia le leoleo ma fesili atu i le tamā: “E te popole i lau ta’avale? Ae fa’afefea lou ATALI’I? Ae na ona fa’amimigi o tau’au o le tama ma fa’apea atu: “Na ‘ona tapunia ane lava o fa’amalama o la’u ta’avale ne’i timu le po.” 

A o le mea sili, o isi fanau, e fa’amanuiaina i tamā-lelei ua matua le tofa, e fa’aavanoa o latou taimi e a’oa’i lelei ai a latou fanau-tama ma alolofa iai – pei o le tasi tama na ta’utino fa’apea: “O le tagata aupito aoga ma tele ai le suiga o lo’u olaga, o lo’u tama. Na tele ona taimi e a’oa’o ai a’u ia ‘ou fa’amaoni ma tama lelei. A’o ‘ou la’ititi, o afiafi uma lava matou te fa’atasitasi ai mo se itula, o a’u ma lo’u uso ma si ‘ou tama e a’oa’o mai i so’o se mea, e o’o i le faitau mai ose tala mai se nusipepa pe fa’amatala mai fo’i se tala malie. Na fa’apena lava i aso uma e o’o lava ina ua ‘ou matua. A o le mea ofoofogia, na gata lava le a’oga a si ‘ou tama i le vasega-valu!”

E mafai tele e le tamā ona fesoasoani i lona atali’i e sa’ili’ili mo lona lumana’i lelei, e ala i le fa’aavanoa o ona taimi e fa’aleleia ai ona tomai ma malosi’aga o iai. O le ali’i o Mickey Mantel – o se tasi o tama-ta’alo fa’apolofesa i le baseball, na fesoasoani malosi iai lona tama. Fai mai Mickey: “O le fa’atoa lima o  ‘ou tausaga, na amata ai ona a’oa’o mai e lo’u tama a’u metotia ma agava’a ‘ese’ese o le ta’aloga…O aso uma lava pe a manava mai, ma te ta’a’alo ai i le matou fale.  

A ‘ou taina nei le polo ma ova atu i luga o le fale, e ta’u e la’ua ma la’u toea’ina matua, ua maua le ‘ai. Ae le na o le pau lena o mea na ia a’oa’o mai – na a’oa’o mai fo’i ia ‘ou to’a ma talitonu i lo’u tagata. Ina ua 15 o’u tausaga, na ia fa’ataga a’u ma te ta’alo fa’atasi ma isi fo’i tamaloloa i le ‘au-baseball a le matou pitonu’u.” Na fa’aalu taimi o le tama o Mickey Mantle e a’oa’o ai lona atali’i ma sa aoga ma manuia. 

Se tama, e le mafai ona te’a ‘ese au a’oa’oga lelei mai lou atali’i pe a afai sa e latalata iai ma fa’atino lou sao. E na o nai tausaga lava e a’oa’o ai ma faufau lona olaga mo le olaga au-i-luma. E le mafai ona toe maua o ou taimi ua ma’umau sa tatau ona a’oa’i ai lou atali’i! E na o le tasi lava le avanoa e te a’oa’i ai ma alofa fo’i i lou atali’i, ina ia avea o se tagata fa’amaoni, e alofa ma lototele e fa’atino mea lelei. Tama, ‘aua le toe ma’umauina se aso! Tatalo nei ia Iesu e fa’amagalo ‘Oe ona o ou ala sese ua le fa’atino ai mana’oga fa’aTama mo lou atali’i. Na o Iesu lava e mafai ona suia lou fatu ma lou tagata atoa ina ia fa’aaogaina atoatoa ai ou taimi o totoe e fa’aali ai lou alofa ma a’oa’o lelei ai lou atali’i. Toe mafaufau tasi lava.

By Maiava 24 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>