Mana’omia se fale mo Pepe ma lona aiga
O Pepe Fetu o se tamā finau.
E ui i le tele o faafitauli ma le le tagolima, ae o lo’o malosi lava le faatuatua o lenei tamā mai le afioaga o Faleasi’u.
O le popolega tele o lenei tama o le lona le mafai lea ona ia fesoasoani i lona aiga aemaise o si ana fanau.
Sa ia taua i le vaega o le Fofoga o Samoa lona manaomiaga tele o le fia faaleleia lea o le latou fale.
O le latou nonofo ai i le fale samoa o se faafitauli lea mo ia ona o le isi itu o le fale e nao le tasi lava le tapoleni o loo iai.
O le isi itu e ta’alaelae, e pei o le itu lea o loo manaomia ai e ia se fesoasoani,
Sa ia taua foi e tele lava se galuega o loo fia faaleleia i le latou fale.
“O lenei fale o le tele ia o faafitauli ma e tasi lava le tali o le toe faaleleia lea ae tatau ona ia le tupe e faatinoina ai ae peitai o le itu lena e leo iai.
“E manaomia mea e fai ai ina ia mafai ona nonofo lelei ma saogalemu ai si ou aiga.
“O le taualuga o le fale ua elea apa ma o le tele o taimi e timu ai o se taimi e sili lea ona faigata ona e le gata I le tutulu ae e faaleagaina uma ai lava meatotino.
“E oo lava i mea e faaaoga e fai ai tagamea e le mafai ona gafatia ma e tasi foi le aluga ma le ieafu e faaaoga.”
O le isi foi mafatiaga o lea tama o le leai lea o se suavai.
“E leai se tane vai e sapalaia mai le vai.
“A oo ina manaomia se vaai e matou te savavali i le fale o le matu aiga e la’u mai vai.
“O le isi itu faigata e leai ni kalone tetele e aumai le vai ma tuu iai, ma o nei tamai paelo e uma ane le tolu aso ua leai se vai.
“E manaomia lava le suavai e gasese ai meaai, o tagamea, o ipu e fufulu ae sili ai o le taeele ai lea.
“E vaai ma le alofa isi au fanau ona o lenei ituaiga olaga o loo latou feola ane ai.”
Ae e le gata ai ii faafitauli o lenei tama.
“E leai foi se matou faleui.
“Matou te faaaogaina le faleui o se tasi o matou aiga pe a matou manaomia, ona e le gafatia ona fai se faleui i le utiuti o le seleni.
“E nao le pau le itu e matou te tua iai ua nao le faatoaga.
“Ae oo foi i le faatoaga e le mafai lava ona gafatia i le tausiga o matou uma lava faatasi ai ma le fanau.
“O le faifaatoaga o lona uiga o le tupe foi lea ae peitai a oo ina timu e leai se mea e mafai ona matou faia e tuu lava le timu ia e fai lona loto.
“E oo foi i fua o faaeleeleaga ia e faatau e le taitai lava le tupe lea e maua mai e tausi ai si au fanau aemaise o le aiga.
“E ese le faigata toe taugata o le olaga.”
Afai e te fia fesoasoani ia Pepe faafesootai le numera 7292410.