Tautua Aiga

By Ulimasao Fata 24 October 2017, 12:00AM

O Lefua Moemai lenei mai le afioaga o Moata’a.

O Lefua Moemai o se tagata galue malosi ma o lo’o nonofo fa’atasi o ia ma lona Tina, aemaise ona tuafafine, ae o ia o le fai fatu aiga tausi.

Na feiloa’i atu le Fofoga o Samoa ma Moemai a’o ia aga’i atu I le sami aua se i’a e fai ai talisuaga a le aiga I le afiafi.

“Ou te alu atu I gatai I le sami aua se mea lelei o le po nanei”.

“Fa’atoa vela a lea o le fa’alifu talo lea la ua aga’i atu ai I le gataifale aua se I’a mo le fofoga taumafa a le aiga I le po nanei”.

Na taua e le ali’i ia Moemai, o lana lava lea masani I aso uma.

“O a’u lava ia lea masani I aso uma lava, e ala usu atu o’u tuafafina I galuega ia ae ou alu ane e tapena le meaai mo le Tina o le aiga, ona toe tapena lea o le meaai aua le aiga atoa mo le aoauli ma le afiafi”.

Na taua foi e le ali’i ia Moemai lona agaga fiafia e maua mai I ana feau masani o le aso.

“E le’I manuia lava taumafaiga aua se to’alua, ia ae pau le mea mautinoa o le ola fiafia lea I a’u galuega o lo’o faia nei I le matou aiga, aua e pei o upu a le atunu’u o le tofiga lava o le tama Samoa o le tautua lea I le umukua o lo’o I fafo”.

“Ia e o’o mai lava I lenei taimi, o lo’o faapena lava ona ou faia lea tautua aua si o’u aiga”.

Na mafia foi ona fa’aali manatu a le ali’i o Moemai I le olaga lea ua iai le tatou atunu’u.

“Ua tele lava le ese’esega o le olaga o Samoa I lenei vaitau fa’atusa atu I la aso”.

“Talitonu o le tele o tagata I lenei vaitau ua na’o le fiafia e fa’atali se’iloga lava e avatu se mea, ua le toe fiafia e galue ona maua ai lea o manuia”.

Na saunoa foi le ali’i o Moemai I le tau o le soifuaga ua iai nei Samoa.

“Ou te iloa ua matua faigata ma taugata le tau o le soifuaga I Samoa I lenei vaitau, ae pau le mea ia tatou taumafai e fai, o le galue malosi lea ina ia mafia ona tatou tali atu iai ma tatou taumafai pe lava e toe aga’i e galulue a tatou fanua ma fa’atoaga”.

By Ulimasao Fata 24 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>