Mata’ina pesepesega Saoluafata ma Fasito’o-Uta
Na ma’eu le mata’ina o fa’afiafiaga na saunia e le E.FK.S. Saoluafata ma Fasito’o-Uta i Pesepesega o le 13 Aso o le Kirisimasi i le tausaga lenei.
O le Susuga i le Fa’afeagaiga i a Samuelu Limua’a o lo’o galue le E.F.K.S. Saoluafata ae o le Fa’afeagaiga ia Uta Muaulu i Fasito’o-Uta.
O nei fa’afiafiaga o lo’o taga tasi lava i le fa’amoemoe o lo’o tapena atu ai le au Kerisiano e le gata i Samoa nei ae o le lalolagi atoa.
O le fa’amanatuina lea o le Liutino Tagata mai o le Atua Soifua e ala i a Iesu Keriso ina ia fa’aola i le lalolagi.
Le tala lea o le Malamalama na fa’ao’o mai e le Misionare i a Ioane Viliamu i le 1830 i a Malietoa i Sapapali’i lea ua sapi ai Samoa i le Talalelei i a Iesu Keriso.
Na amata le galuega a le Lonetona Misionare Sosaiete i totonu o Samoa ia Aokuso, 1830. Ina ua asiasi mai Rev. John Willians (Ioane Viliamu), lea na malaga faatasi mai Rev. Charles Barff (Papu) i Samoa ma tuu i Sapapalii ni faia’oga Tahiti ma isi nofoaga i le motu o Savaii.
O le 1835 na tofia ai ni misionare Europa se to’aono, e pei o Messrs Heath, Hardie, Mills, Macdonald, Murray ma Branden.
E le’i umi ae tofia loa ni pule a’oga se to’alua ma se tagata e lomia faamaumauga. O le 1837 na tuufaatasia ai ekalesia i se vaega e tasi.
E o’o ma ii le 1840, ua aofia atoa motu autu e tolu o Upolu, Savaii ma Tutuila i se fesootaiga e ala i nofoaga o ekalesia lea ua o’o mai lava le taimi lenei le fa’atupula’ia ai o ekalesia ma ona tagata lotu.
O nisi nei o ata mai lea po i fa’afiafiaga sa fa’atinoina ai.