O aitu poo temoni sa sili ona fefefe ai tagata Samoa ona e afua mai ai ma’i e tusa ai ma faamaumauga a Misi Sitea- o Moso, Nifoloa ma Itagatā.

O le mata’utia  la o le aitu lea poo le temoni o Itagatā, ona fai mai tagata Samoa e matua gasegase ai lava le tagata i le pūpūtoto ma le lipiola poo le oti faafuase’i.

O nei temoni poo aitu i nisi e masani ona latou ulufia tino o ositaulaga faapaupau ia e auauna ia i latou, ona mafai lea ona liua e avea ma manu.

O ositaulaga la e nofoia lea nofoaga, e i ai le latou tanoa la’au telē lava e igoa o le ‘Lipi’ poo le ‘oti faafuase’i’ O le isi foliga o lea atua o le ‘fe’e’, ma ona o lea tulaga-e leai se avanoa e maua e le aiga.

Aua a tula’i mai se gaoiga o mea e pei o ‘ie toga poo isi lava meaalofa a se aiga ua pisia ma avatu i le ositaulaga ina ia mafai ai ona ia fetu’u le gaoi ma ia faata’ootolia i le ma’i.

Ona nonofo lea i lalo o le ositaulaga ma ni sui filifilia faataamilo i le tanoa lea ua fai ma sui o le atua ma tatalo i ai mo se taui ma sui faanatinati o le tagata gaoi, ona faatalitali uma lava lea ma matamata i le mea o le a tupu i lea tagata gaoi.

I le tele lava o taimi, o le a muamua lava ona vaaia uiga solitulafono o le gaoi pe a po’ia i se ma’i ma aveina atu i se fata laau faatasi ai ma ni talo, popo, ufi, i le fale o le ositaulaga e avea ma taui o mea na gaoia.

E avatu foi ma ‘ietoga ma isi lava meaalofa ina ia mafai ai lava ona toe tatalo tasi le ositaulaga i luga o lea tanoa o le oti ina ia toe aveese le fetu’u.

O Moso foi e tusa ai ma Misi Tana, o le tanoa e teuteu i atigi sisi papa’e sa avea ma ona foliga vaaia, ma sa faaigoaina e ia ositaulauga o ‘taulaitu vavalo ma Faitui’e mafai ai e ositaulaga ona iloa le mea ua tupu ona fetu’u loa lea.

Sa matua sili ona fefefe tagata i le Nifoloa, lea sa matua lamatia ai le nu’u atoa o Falelima i Savai’i talu ai lona ‘nifo umi.’ Ae o le tusitusiga lenei a le Alii o Stuebel e uiga i le Nifoloa, fai mai: “E fealua’i solo Nifoloa i le atunuu atoa, talu ai o ona foliga e pei lava o le tagata.

E fealua’i solo i le tele o nu’u ma fasioti tagata pe a ita i se nuu. O amioga masani nei a le Nifoloa:”Afai e nofotane se tama’ita’i Falelima i se alii Aleipata poo le Tuamasaga poo Aana, e mulimuli ai lava ma nofo i totonu o le aiga ua faaipoipo i ai lea tamaitai.

E le vaaia lona tino e tagata Samoa uma. A vaai se tasi i le manu o le Ve’a o fealua’i faataamilo i se fale i le afiafi po poo se pua’a pa’epa’e telē, ona faapea lea o tagata Samoa o le ata vaaia lea o le Nifoloa, aua e leai se pua’a pa’epa’e telē faapea a lea nuu.

E le faatagaina e le Nifoloa lea tulaga pe a savalia le itula e 6 i le afiafi, e o’o lava i le savali o se tasi e lata i le fale o le aiga o loo nofotane ai le fafine Falelima. O le pu i le tino o le tagata ua lavea i le nifo o le Nifoloa e le iloa i le vaai a mata, ae matua tigaina lava lea tagata.

A vave ona maua se vaifofo, ona faatoa mafai lea ona iloa lea pu i le tino o le tagata ua lavea. Afai e leai se vailaau e togafiti ai i se taimi vave, e oti lava lea tagata. Se’iloga lava ua oti le tagata, ona faatoa mafai lea ona Iloa e mata o le tagata le vaega tonu o le tino na tuia i le Nifoloa.

E o’o mai lava i aso nei, o loo tumau pea le popole o tagata Samoa i le Nifoloa. O alii ma tamaitai, teine laiti ma tamalii- ua ona tui e le Nifoloa. O vae, lima ma le ulu ae le o le tino o le tagata e tui e le Nifoloa.

A lavea se tagata i le Nifoloa, e leai se tasi e mafai ona fai atu i ai o lea o le a alu se tasi e aumai se vailaau e tete’e ai le Nifoloa. Afai e iloa e se tagata ua lavea i le Nifoloa- e alu se tasi e aumai se vailaau mo ia, ona atili ai lea ona faa-tigaina e le Nifoloa ma vave ai ona oti.

E mafua ona e vave le alu a le Nifoloa i le togavao i lo le tagata o loo alu e aumai le vai.

E taunuu atu la lea tagata i le nofoaga na te iloa e maua ai le vai -e tete’e ai i le Nifoloa; na te le maua ai se laau e tasi ona ua uma ona tase’i uma i luga e le Nifoloa ma tia’i ina ia le maua ai se vai e palu ai le vai ma avatu i le tagata na lavea.

Afai e faafuase’i ona ma’i se tasi ona o le savali solo i le afiafi poo le po, ona vave alu loa loa lea i le fale ma taoto. Ona fesili loa lea  o lona aiga pe o le a le mea ua faaletonu- ae fai mai ua te’i lava ua gagase ona vae ma ua maalili.

O iina e iloa ai e le aiga- ua tatau ona aumai se vai e tete’e ai le Nifoloa. Ona fili loa lea o se tagata e to’atasi e alu e aumai se vai. E iloa e tagata le vai ae latou te le faaigoaina o Nifoloa, ae ta’u o le “‘vai o le ‘oloā”.

Afai o le tagata lea e aumaia le vai o loo latalata ane i le fale o ta’oto ai le ma’i, o le a nofo loa i luga o ia- e aunoa ma lona iloa na alu se tagata e aumai se vai mo ia. O lenei faiga o le a iloa ai e le aiga- e moni na lavea o ia i le Nifoloa.

Ona sau ai lea o le tamaloa ma le vai, ona fesili lea o le ma’i poo le a le mea ua sau ai. Ona tali mai lea o le tasi-ua sau ona o Pai ma Lafai. Ona taoto lea o le ma’i ma moe. Ona fesili malie lea o le tagata na sau ma le vai- i tagata o le aiga pe na fai mai le ma’i o fea tonu o tiga.

Ona tali mai lea o tagata o le aiga-Fai mai e tiga tutui ona vae ma ua malulu lava lona tino. Ona tago loa lea o le tamaloa ua fofola le vai i luga o lona lima ma soso atu i le vae o le ma’i ma ‘u’u i le isi ona lima ae mili i le isi ona lima le vae o loo tiga.

Ona moe lea o le ma’i mo le fa i le lima itula. E ala ane ae fesili atu loa lona aiga-a ua alu ese le tagata na alu atu ma le vai, pe sa ma’I muamua.Ona ia faamatala atu loa lea o le vaega tonu o lona vae na muamua tiga ma amata ona malūlū.

Ona latou iloa loa lea, na lavea o ia i le Nifoloa. Ona faatonu loa lea o le ma’i  e le foma’i ina ia onosa’i ma mataala  ae ‘aua le moe to’atasi mo po e fa. E uma ane ona mautinoa loa lea o le nofoaga na lavea ai le tagata i le Nifoloa, ona malosi lelei loa lea o le ma’i.

Ona pa loa lea o le manu’a ma tafe mai ai le toto ma le alou ona o le vai na togafiti ai, ma e fai lava lea vai i aso uma. O lea vai e fai i laulaau ma le pa’u o nisi o la’au e matua mama pala e le fofŏ.

GASEGASE MA VAIFOFO

Vai o le Sela-O le Talafalu, Aloalo- o Lau pa’ū e palu ona inu lea.

Vai o Ivi ‘aso’ao—O le Puavao, Fue-sa, Asi manogi e tu’i ma inu.

Vai o le fatafata-O Lau Aotā ma lona lua o ituaiga o le ‘Au e tu’i-afīfī, palu ma inu.

Vai o le Mamapala-Pulu o le Namulega, ogalaau e inu; e sa le ‘ai mea lololo.

Vai o le Pua’i-O le lau togotogo ma le Mau’utoga, Laugā-pāpā-e sa le ota.

Vai o le Pua’itoto- O le Lautamatama ma le A’a o le ‘Aute; Aloalotai, Gatae-e tu’i faatasi ona mili ai lea.

Vai o le Tooala-O le Aute e tu’i, palu i sina vai ona ave lea tunu.Ona aumai lea faatotoe sina mea e lomilomi ai le manava, poo le nonu ogalaau e tu’i -ona tunu lea i sina vai inu.