Tala mai le Palemene o Samoa

By Maiava 25 March 2016, 12:00AM

Fono Fetufaa’i a le Palemene

O le a faia se Fonotaga Fetufaa’i a le Palemene e fa’a’Autu ia “Samoa: 53 Tausaga ma le Paea’iga a le Palemene Lona 16, i mata’upu e aofia ai le Ta’ita’iga ma Faigamalo Lelei, ma le Malosi Fa’aleTulafono”. O lea fonotaga o le a amata le Aso 29 – 31 o Mati, 2016 i le Potu o Fa’asalalauga, i le Maota Ta’alo i Tuana’imato – le nofoaga le-tumau o le Ofisa o le Failautusi o le Fono Faitulafono.

O le fonotaga lea, o le soso’oga o le Polokalame Fa’amasani ua saunia mo sui usufono fou o le Palemene ma ua fuafua e si’itia ai le silafia, i mana’oga tau faiga-malo lelei ma tulaga fa’aTa’ita’i. 

O le a fa’afofoga ai Sui o le Palemene i saunoaga mai isi Vaega o le Malo e ala i Lana Afioga a le Fa’amasino Sili fa’apea le Palemia o le atunu’u.  

O le a saunoa ai fo’i le sui o Samoa sa avea muamua ma Fa’amasino o le Fa’amasinoga Fa’ava-o-malo, o Tuiloma Neroni Slade, le Komesina o Sulufa’iga, o le Pule ma Su’etusi Sili a le Malo fa’apea isi Ofisa Sili o Matagaluega ma Fa’alapotopotoga a le malo, lea o le a saunoa e fa’amalamalama tiute ma faiva aua le va’aia lelei ma le fa’aaogaina tatau o tupe a le atunu’u. 

 

Fonotaga Fa’aPalemene mo Sui-Faipule Tama’ita’i

O le a talimalo fo’i le Palemene i le Fono Lona 4 Fa’aPa’aga a Faipule Tama’ita’i o le Pasefika, lea e galulue so’o-so’o-tau’au ai ma le Palemene a Ausetalia - e ala mai i le Poloketi o Faiga Fa’aPa’aga ma Sui Tama’ita’i o Palemene a le Pasefika (PWPP) i lalo o fesoasoani a lea malo.

O lea poloketi o lo’o fuafua e una’ia ai le malosi o faipule tama’ita’i i totonu o le Pasefika, ma le fa’amoemoe e fa’aleleia nisi o vaega e mafai ona manuia ai ma ‘ausia e tina o le Pasefika tulaga i totonu o ‘Upufai-a-malo ma silasila fo’i i fesoasoani latou te mo’omia pe a filifilia ma tula’i mai.  

O le manulauti atoa o lenei tausaga, o le “Fa’amalosia lea o le Tamaoaiga o Tama’ita’i”, lea o le a saunoa iai le Fa’atonu Aoao o le Komisi o le Pasefika, o Ofisa mai le Faletupe o Atina’e a Asia fa’apea nisi o tina o le Pasefika (e aofia ai Samoa) o lo’o avea ma Ofisa Sili i Matagaluega ma Fa’alapotopotoga a le Malo. 

O lea Fonotaga o le a faia i le Maota Fono o le Palemene, ma o le a mua’i amata i se ‘Ava Fa’aaloalo e talimalo ai le Ao Mamalu o le Malo, Afioga a Tui Atua Tupua Tamasese ‘Efi ma le Fofoga Fetalai o le Maota, o Le’aupepe Fa’afisi.

By Maiava 25 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>