Fa’amanuiaga o le Fa’amasino fou e Aualofa ai i Matua

By Pai Mulitalo Ale 25 August 2016, 12:00AM

O ananafi na fa’atautoina ai se Fa’amasino fou mo le Fa’amasinoga Fa’aItumalo a Samoa, o Talasa Lumepa Atoa Sa’aga.  

O taunu’uga lelei ia ma ana taumafaiga uma, sa aualofa ai le Fa’amasino fou i ona matua, o Va’asili’ega Potoi Atoa ma Lesina Atoa (ua fai i lagi le folauga) mai Vaimoso.

I le sauniga o le fa’atautoga, na fa’afetaia ai e le Fa’amasino o Talasa, le Fa’amasino Sili, Patu Tiava’asu’e Falefatu Sapolu, ona o le avanoa ua mafai ai ona ofi i totonu o le taulotoa’iga o galuega a le Fa’amasinoga.  

Sa fa’apea fo’i ona ia fa’afetaia le galuega fita a nai ona matua, lea sa tapua’ia ma tatalo i ao ma po, ina ia manuia ana taumafaiga uma ma maua sona lumana’i manuia. 

“O lo’u nofo ai i le nofoa lenei i lenei aso, o fua ia o talosaga molia a nai o’u matua fa’aopoopo iai lou taumafai mo se lelei i le lumana’i,” o le fa’aaliga lea a Talasa.

Na ta’ua fo’i, e le fa’agaloina fautuaga a si ona tua’a, mai lava a’o la’ititi fa’atoa fa (4) ona tausaga. 

 “Fa’atuatua i Le Atua ma lou loto atoa ae ‘aua le fa’amoemoe i lou lava atamai. So’o se mea e aga iai, tautuana ma manatua Le Atua e fa’asino mai le ala tonu e ui ai.” 

O le Afioga a le Fa’amasino Sili, na fa’afeiloa’i le fa’amasino fou ma fa’amanatu iai le tautuaina o Samoa, tu’u’ese le alofa fa’apito ma le loto-ita, ae tautua ma le fa’amaoni ma le le-fefe pe fa’aitu’au. 

 “E tutusa tagata uma i le va’ai a le Tulafono ma e le fa’ailoga-tagata pe manatu fa’apito a ia tutusa tagata uma, mauoloa pe matitiva, malolosi pe vaivai, e tutusa tagata uma,” o lana saunoaga lea. 

Sa fa’amanatu fo’i i le Fa’amasino fou, le tautoga ua ia faia, o le tautuaina lea o Samoa e tusa o le Fa’avae o le Malo fa’apea le Tulafono. 

“O le avea ai ma fa’amasino, o le a le-toe iai ni lagona a’o ni va’aiga fa’aleTagata a o le a tula’i ai ma galue tuto’atasi, ia tusa ai ma le ta’ita’iga a lo tatou Atua,” o tima’iga ia a le Fa’amasino Sili.

Sa fa’apea fo’i ona tima’i atu le Loia Sili a le Malo, o Lemalu Herman Retzlaff ma fa’amanatu i le Tama’ita’i Loia, o lona tofiga i le aso, o se fa’aeaea ma se fa’amanuiaga, o se tautua ma le ta’utinoga e le tatau ona ‘ave-mamaina ae maise i le taimi e tele ai fa’afitauli e lu’itauina ai.   

Na fa’afetaia e le Sui Peresetene o le Sosaiete a Loia Samoa, o Alalatoa Rosella Papali’i, lea fo’i la’asaga iloga mo le Sosaiete, ae maise i le soifua taumafai o le Fa’amasino fou.

O le fa’aopoopo atu i le laulau a fa’amasino, ua le gata o se matati’a mo tama’ita’i fa’amasino, a ua siitia maualuga ai fo’i tu’utu’uga mo le ulufale atu i le saofa’iga a fa’amasino.

Na fa’amatalaina ai fo’i e Alalatoa le Tama’ita’i Fa’amasino fou, o se tasi e finau, o se ta’ita’i na soifua mai lava ma uiga fa’aTa’ita’i e pei ona va’aia i taimi a’o a’oga.

Ae sa ia suia vave lagona o lea taeao i lona fa’apea, “O ia le tama’ita’i aupito lauiloa i le a’oga na mafua ai ona fa’aigoa o King Kong, ona o ana gaioiga ma mea e fai ae sa fa’aigoa fo’i o le Marilyn Monroe lea a Samoa,” 

 “E le tau natia, o le galuega lenei sa tele ina fa’atino e le itupa o ali’i, peita’i, ua sui ta’aviliga o mea i nei taitau ma ‘ou te matua mimita e fa’ailoa atu, ua amata nei ona pulea le galuega nei e tama’ita’i,” o le saunoaga malie lea a Alalatoa.

O Talasa, o le lona lua o tagata-fa’au’u mai le USP ua tofia e avea ma fa’amasino o le Fa’amasinoga a Samoa.

Na fa’au’uina i le 1999 i le fa’ailoga Tipiloma (Post Graduate Diploma) o galuega fa’aLoia ma talia ai i le Laulau a Fa’amasino i Fiti, i le taimi lava lea ua fa’aofi ai i le Laulau a Fa’amasino i Samoa nei. 

O le Fa’amasino o Talasa Lumepa Atoa Sa’aga, o se tasi fo’i ua fa’amaonia aloa’ia mo le fa’atalanoaina o mata’upu e Soalaupule i Samoa nei.  

By Pai Mulitalo Ale 25 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>