E leai lava se isi nofoaga e sili nai lo le aiga moni.

O le finagalo lea o le taule’ale’a ia Junior Chang, 27 tausaga mai le alalafaga o Leusoali’i. 

Na fa’ailoa mai e Juniour i le Fofoga o Samoa, e sili lava le ola ma nofo i le aiga moni e maua ai le filemu ma le ola fiafia.

“Ou te fiafia lava a’u ia i le olaga i nu’u tua nei po’o si o matou aiga ona e ese ma le filemu. 

“E mo’i lava e iai nai fa’afitauli laiti, ae o le olaga a ia i totonu o le nu’u, e faigofie lava mea uma. 

 “E ola lava le tagata ia o lona ia pa’usisi ma e le faia fua e le isi aiga le isi aiga.”

Na ia ta’ua e leai lava se nofoaga e sili atu nai lo’o le aiga moni. 

 “Ia te a’u lava ia, e sili atu lava lota aiga na ola mai ai. Ma o le ala foi lea o lo’u fai atu e sili lava le ola ma nonofo ma le aiga moni.”

“O a’u e matua ai lava i le fanau a o’u matua, ma o lo’o taumafai lava e avea a’u ma fa’ata’ita’iga lelei i nai o’u tei.

Na ia ta’ua foi e a la ona ese’ese le olaga i totonu o nu’u ma afioaga ona o le tagata lava ia. 

E le gata i lea, o le isi tulaga ua amata ai ona suia le olaga i Samoa, ona ua tauau ina mou atu le tu ma le aga fa’aaloalo a le Samoa. 

“O le isi tulaga lena ua ese’ese ai le olaga i le taulaga ma nu’u i tua i nei. O tauau lava ina leai se fa’aaloalo. 

“Auā foi la o tua i nei, e masani uma le to’atele o tagata. Ae o Apia o lo’o tumu i tagata ese’ese. E faigata lava la ona tausi le filemu auā e faigata ona fa’aaloalo le isi i le isi tagata. 

“E iai lava le feso’ota’iga ma le mafanafana o le mafutaga a aiga i tua i nu’u i tua. 

Ae peita’i, na ta’ua e Juniour, o lo’o sologa lelei pea lava le olaga o Samoa, ma e leai lava se nofoaga e sili atu nai lo’o le aiga na ola ma tupu a’e ai. 

“O le isi tulaga e lelei ai le nofo i tua i nei, e fai fiafia lava fe’au a le tagata ia. A fia alu i le ma’umaga i lesi aso, ae fagota i lesi aso, e leai lava se mea o iai. E le pule mai lava le isi tagata i le olaga o le isi tagata.”