Tautuana fanau
Ua tauau ina leiloa atu a tatou tu ma aga-i-fanua.
O lea le finagalo o le tama i a Vili Elisaia o Vaitele-Fou i le Fofoga o Samoa i le aso ananafi.
“Ia e pei o lea lava le tulaga ua i ai nei si o tatou atunu’u ua amata ona mou atu ma ua leiloa ma o se itu faigata tele lea i lo’u iloa i ai."
“O nei aso ia ua pule lava le tamaititi ia i lana gaioiga e fai, ua alu lava le tagata i lona auala e aga i ai ae galo le tulaga fo’i le le o le taumafai e fa’atino mea uma aua le lelei o nai fanau."
Na ia fa’ailoa o le isi tulaga faigata o le leai lea o se itu e mafai ai ona auai fa’atasi o matua ma fanau i taimi o faigalotu.
“O lea lava le tulaga o lo’o ua i ai le taimi lenei, o le uiga o la’u tala afai ae le mafai ona toe aumai la aso i aso nei."
“O le isi lea popolega, aua o aso la na fa’atasi aiga uma i taimi o faigalotu, e pei o le isi lea taimi e mafanafana ai le nonofo o aiga ta’itasi aua le aga’i atu ai le lumana’i."
“O se itu lelei tele lea i lo’u iloa i ai, aua a le aunoa ma lo tatou ola e taumafai ai pea i nai fanau ina ia ola i vaega nei o le o fa’atasi i le Atua i afiafi ma taeao."
“E tau fesiligia lava le tulaga e o’o i ai."
O le isi vaega na ia fa’ailoa o lenei vaitau ua tauau ina fa’avaivai matua e una’i fanau i aoga.
“E pei o lea lava le tulaga o lo’o i ai le taimi lenei, ae e ao i matua ona fesoasoani i fanau, aua e pei o lea le tulaga o lo’o tele ina alia’e mai ai fa’afitauli ona o le tu’utia’i o fanau."
“E ao lava ona silafia lelei o lea le tulaga mautinoa e ao ona i ai pe a le faia o tatou tiute fa’amatua."