Malelega Fa’amanuia mo le Kirisimasi 2016
Fai mai le muagagana, e foa’i e le Atua le filo i lē lalaga ma le faatuatua. E faapitoa i tinā ma le itupa a tama’ita’i le matafaioi o le lalaga. O le uiga o lenei muagagana, e lagolago ma ‘apo’apo e le Atua ia ē lalaga ma le faatuatua.
O le lalaga, o le galuega e faamoemoe i le soosoo mea lelei. E māfua ona sii le matālalaga ona o le taumafai e soosoo le lau’ie, pe soosoo le laufala.
A liliu mai i le tala o le Kerisimasi, o le tinā e lalaga ma le faatuatua, e faasino iā Maria ma lona faatuatua i le fe’au a le Agelu, o ia ua togia e le Atua e fanau mai ai Iesu le Faaola.
O le fe’au tāua o le lalaga, o le soosoo mea lelei. O le soosoo mea lelei o le tina ma le pepe o le a fanau mai. O le soosoo mea lelei o le vaevae o le manava e fanau mai ai le tagata. O le soosoo mea lelei o le pute ma le fanua e tanu i le lau’ele’ele. O le soosoo mea lelei o le tofa mamao ma le faautaga loloto. O le soosoo mea lelei o le mafaufau ma le agaga.
O le soosoo mea lelei o le tagata ma lona si’osi’omaga. O le soosoo mea lelei o le tagata ma le uso tagata. Ae silisili, o le soosoo mea lelei o le tagata ma lona Atua.
I lenei vaitau, ta’ua le gagana a Asau, ua pa le fana a Tulia. O lona uiga, o le faailoilo o mea e ono tutupu. Talu ai nei na maua e Leoleo le tele o laau faasāina. Ua aafia ai tupe, faapea ai ma masini e gaosia ai ituaiga laau faasāina malolosi. Ua aafia ai ‘au’upega aemaise ‘au’upega e faaaogāina i Taua.
E ao ona felagolagoma’i le Malo ma le atunuu e fo’ia le faafitauli lenei. E ao ona tatou lalaga se mafutaga e soosoo lelei ai aiga ma nuu; aua e malupuipuia ai tatou mai le sasa ma le faatama’i a laau faasāina.
O le Kerisimasi o se vaitau o le ‘oli’oli ma le fiafia. Ae o se vaitau fo’i tatou te mafaufau loloto ai po o le ā se fe’au faapitoa a le Kerisimasi mo i tatou?
Mo a’u, e lua (2) lava fe’au tāua o le Kerisimasi lenei – o le aiga ma le faatuatua.
I le mataupu o le aiga, ou te mafaufau iā Maria le tinā lalaga mea lelei. Na te ia lalaga ma le alofa, le onosa’i ma le faatuatua le ‘iesina, e molimauina le aiga fealofani ma le to’afilemu.
I le mataupu o le faatuatua, ou te mafaufau i le matua o la’u tautalaga, E foa’i mai e le Atua le filo i lē lalaga ma le faatuatua.
Ia manuia le Kerisimasi.