E masani ona ou fai atu, na maliu Iesu mo tagata uma; ae le o tagata uma e faaolaina. O Samoa uma foi e lolotu, ae le o tatou uma ua tonu! Ia poo oe foi o loo mafi i le taulagi o lou faaolaina, ae matuā tuufaafeagai lava ma lau amio ma ou uiga. E māfua i se a ae mea ane o tatou o tagata kerisiano? Maifea ia faaletonu, a o Samoa o le atunuu lotu? A o gafea o lou siomaga faatagata lotu e mafai ai ona e oo atu i le Malo o le lagi? Fai mai Iesu, E le sao atu i le Malo o le lagi i latou uma o e fai mai ia te a’u, Le Alii e,  le Alii e, na o le na te faia le finagalo o lo’u Tamā o i le lagi. 

Ae le nāmalelāina Samoa, o le ma’i lea ua matuā pesi faa-ma’i malosi i o tatou tagata, o le tapuai faafoliga i le Atua (Isa.29:13,14). E masau tele le Praise the Lord! Viia le Alii! Aleluia! Amen! Ae le o mafai ona tausia e le olaga o aso uma. E poto ai le gutu, ae le āmu le mulu. O le tele foi o taimi ua faapalasi ma tagi talatala, a o le loto e tumau lava i le leaga. E selau pasene le theory, ae oki le practical. A o le mea tonu lea o loo mana’o ai Iesu – ia faia le finagalo o le Atua e tagata uma ua iloa le Atua ma talitonu ia te ia. Ia le na o upu, a o le faatinoga o upu. Ia fai le upu tautala, ma upu galue.

O lenei lauga umi a Iesu, o le tapenaina o le olaga o le tagata i faamanuiaga o le faaolataga. Ua faataoto e Iesu le ta’iala e saili ai le malo o le lagi e pei ona aumai i lana folasaga (Mata.5:3-11). Amuia e loto maulalo; amuia e agamalu; amuia e alolofa atu; amuia e loto mamā; amuia e faatupuina le filemu; amuia e sauāina ona o le amiotonu….O le ivi tu lea o le sootaga o le tagata saili, ma le faamoemoe o loo saili – o le amio. A o laei ia o le amio (Mata.5:3-11). Le amio ua faatonu e le loto, ae le o le gutu. Auā e le sao lava i le malo o le lagi le gutu e taulagi le suafa o le Alii, ae ta’aa’ina i manatu o tagata ma auala a le fili. E mapo lotu, ae le iloa le amiotonu. Ua faalogo i leo o tagata ma a latou ta’iala, ae fainaelo i le Atua ma lana faasinomaga. Fai mai Iesu, e iloa i latou i o latou fua (Mata.7:16). E tautala mai, e faalelalolagi. O ō latou lava leo (tone), na o latou lava faamanuiaga, na o latou lava le faaolataga(selfish). Fai mai Iesu, E le sao i le malo o le lagi. 

Samoa e, ua faaali atu e le Atua ia te oe le mea lelei, se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feoa’i ma lou Atua ma le loto faamaulalo? (Mika.6:8). Samoa, e te iloa ua mafai e perofeta pepelo ona faamalolo ma’i? E mafai foi ona latou faia faailoga ma vavega e tele! E tele foi ma anoanoa’i tagata  ua mulimuli ma faasesēina ai. Tele perofeta pepelo i le lalolagi, ua faapena foi i Samoa.

Uso e, se i toe vaai lelei ou mata, pe te le o tauto’ai solo atu ai ma oe. Pe le o oe le isi o loo tagi soo ma ta’u le suafa o Iesu, ae fuā ma ‘e faamasino le finagalo pule o le Atua i lona valaauina o ona tagata i nisi galuega ua finagalo lava ia iai? Pe le o mamalu o Keriso o loo e tiu ai ma su’e ai ou viiga? Poo e iloa le mamafa o le faaiuga a Iesu i le tagata e faafoliga lona olaga lotu ma lana auaunaga i le Alii? O le tautinoga a Iesu (f.23), muamua, ou te le iloa lava outou. Oka! gau atoa le olaga tapuai sa auauna ma galue ai! Ua oo i le taimi o le seleselega ae fai mai Iesu, na te le iloa oe! O fea la e te alu iai pe a oo mai le siitiaga? Lua, e le o fia vaai Iesu ia te oe. Na te le manaomia oe.

Auē! Sa sili ai pe ana le fanau mai i lenei lalolagi (Iopu.3:11), auā ua tuli ese e Iesu. Tolu, ua lalau e Iesu le amio leaga! O outou o e fai amio leaga.O le a le amio leaga? O le taulagi o le suafa o Iesu ae le mafai ona savali ma ola ai. O le faaaoga o le suafa o Iesu e mailei ai o tatou mana’o. Ua fai ai a tatou pisinisi. Ua su’e ai a tatou mea. Uso e, e le mafai ona e sao i le malo o le lagi i lena ituaiga olaga.

O le tagata ua alu i le Atua ma ua tuuina atu lona tagata atoatoa e auauna ai i le Atua, e le toe faalogo i leo o le lalolagi; e le toe usitai ini ona mana’o; e le toe vaai i tua (Luka.9:62). Fai mai Iesu, e le tatau lea tagata i le malo o le Atua.

Le ekalesia e, alu mamā i le Atua. Fai mamā le galuega a le Atua. E le faia ai ni a tatou pisinisi i le suafa o Iesu ma le galuega a le Atua. E le lua ni Atua e auauna ma tapuai iai le tagata kerisiano moni (Mata.6:24). O la tatou pisinisi, o agaga o tagata. E le luagia i ni mea a le lalolagi. Fai mai le aposetolo o Paulo i le ekalesia i Filipi, o lapisi mea uma a le lalolagi ina ua ou maua Keriso (Fili.3:7,8). Ae a lou tagata saili?

O le isi mata o le Atua, a o le isi mata o le oa a ea? Folafola e le isi lima le finagalo o le Atua, ae asamo i le lalolagi le isi lima! E te le i ma’ona i le alofa o le Atua i aso uma? Pe le i lava ea le soifua o lo tatou Alii o Iesu Keriso, na faasauāina, na faasatauroina, ma maliu e fai ma mana i lau auaunaga? E le mafai ona faaolaina oe i se olaga faavaeluatai poo se auaunaga e lualuagia i ou manaoga faale tagata, auā o le mea ua iai lo outou oa, e iai atoa foi ma o outou loto (Mata.6:21).

Samoa pele e, o lou faaolaina o loo i ou lava lima. E le na o le pese i le suafa o le Alii. E le o le soona faaaoga o le suafa o Iesu e laei ai ma e tiu ai. A ia mamā le loto. Ia agamalu ma loto maulalo. Fai le amiotonu ma naunau i le alofa. O faiva na o le amio o loo tautala ai Iesu (Mata.5:48).

A o le amio foi lenā e talileleia ai i le malo o le lagi. Afai la e le mafai ona e olaina le fingalo lenā o le Atua, e le mafai foi la ona e sao atu i le malo o le lagi. A le mafai ona sao oe i le faaolataga, e fai la mo ai le malo o le lagi?

Amene

E-mail: [email protected]

7737063/7783782