O se miti e fia avea ma faia’oga
O Tovia Moevao mai Tuanai ma Lano Savaii.
E 22 le matua o lona soifua ma sa ia ta’ua lana miti e fia avea o ia ma faia’oga i le lumana’i.
O lona aiga o se aiga e lelei i galuega kamuta ma le palama ae peita’i o Tovia, sa ia mafaufauina lava sesi auala mo lona lumana’i.
O ia o le ui’i o se fanauga e to’aiva ma o lo’o a’oga nei o ia i le a’oga fa’afaia’oga i le Univesite a Samoa.
“O a’u a ia ua leva ona ou mana’o ou te galue fa’afaia’oga,” o lana tala lea i le Fofoga o Samoa.
“O se tulaga e ese mai lava i galuega ia e fiafia ai le matou aiga e fai, pei o le palama.
“Ae masalo ona o se tasi o galuega ua leva ona ou moemiti ai lea la ua ou mana’o ou e fa’ataunu’u i le lumana’i.
“You know it’s something completely different from my family’s background in carpentry work.”
O a’oa’oina o fanau o se galuega lea e taua tele mo se lumana’i o so’o se atunu’u ma o lo’o malamalama fo’i Tovia, e tatau lava ona fai fa’alelei lana a’oga ina ia maua ai lenei manuia mo ia.
O lo’o fesoasoani fo’i lenei tama i le tausiga o lona aiga.
“O le taimi nei, o le alagatupe lea e fa’alagolago ai lo’u aiga, o le fa’atauina atu o le koko Samoa.
“O lo’o galulue ai la lo’u tama ma le to’alua a lo’u tuafafine i le va’aiga ma le faiga o le fa’ato’aga koko.
“O le matou alagatupe mautu la lena ae e fesoasoani fo’i isi o’u uso e to’alua ia e faigaluega.
“E iai fo’i nisi o uso mai atunu’u i fafo e fesoasoani mai fo’i.
Sa ia fa’apea mai “Toe a la o a’u lea e le’i faigaluega aua o lea e tau fa’auma la’u a’oga.
“Ae e malolo mai fo’i le a’oga, ia e fai fo’i sina galuega mo le aiga i le fa’amamaina o le fanua.”