Faigata le soifuaga

By Ulimasao Fata 26 November 2017, 12:00AM

Tavita Kalolo, 45, tausaga mai  le afioaga o Lotofaga – Uta na maua atu e le Fofoga o Samoa o loo fai mai ana galuega i lona lava fanua I le aso ananafi.

Sa ia taua ai e faapea, “O le matuai taugata lava o le soifuaga ma o lea lava o loo vaaia lava lea tulaga i le tele o faafitauli o loo fegai ma aiga.”

“Ua alu i luga le taugata o le soifuaga i Samoa nei.”

“O lo matou aiga e na’o si ou to’alua o loo faigaluega i le faletalimalo o Saletoga ma o ia lea o loo faamoemoe iai le tausiga o lo matou aiga i le itu tau le seleni.

Ae o a’u nei o loo ou galue lava I le faatinoina o le faatoaga maua mai ai foi se isi itu tau le taumafa ae a tele ona fa’atau atu lea I le lautele o le atunuu e maua mai ai se isi seleni.”

Peitai e ui lava I lea e lē lava le seleni o loo maua mai mo le tausiga o le aiga aua ua matua’i taugata lava le soifuaga faatasi ai ma le tau o oloa ua taugata foi.

Ae le faapea ole a faatuatuanai ai le tele o faalavelave tau le aiga faapea ai le nu’u ma le ekalesia.

“O le isi tulaga faigata o le lē maua lea o le auaunaga o le suavai. O loo faalagolago lava le maua o le suavai mai le timu ma faasoasoaina lelei.

Ae a le toulu lava timuga ua faigata foi e si o matou aiga ona maua le suavai e faaaogaina mo le gasesega o taumafa, faamalu ai faapea fo le fofoga taumafa.”

By Ulimasao Fata 26 November 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>