'Ese le faigata o lenei olaga' - So'olefai Siitagata
So’olefai Siitagata o se tama 25 tausaga le matua mai le afioaga o Lotofaga na faasoa mai ona faafitauli o loo feagai ma ia.
“Ese le faigata o lenei olaga. Ae matuai faigata lava ona o le alofa i e pele ia te oe ae leai se mea e mafai.”
“I le taimi nei e le ola se matou eletise. O le ala foi lea e matou te vave momoe ai lava ma si au fanau i lea aso ma lea aso.”
“O le suavai o se tasi lea o vaega taua o le soifua o le tagata ma e manaomia peitai o se tasi foi lea o faafitauli I totonu o lo matou aiga.
O loo matou faaaogaina foi le fale lē taua elei sei tulou, lē gatafia foi se faleletaua e pei ona faaaogaina e le toatele o aiga I lenei vaitau.”
“O le matou fale matuai manaomia lava le faaleleia, ona o le fale o loo matou momoe ai i le taimi nei o loo faaaoga le isi itu mo le gasesega o taumafa.
A e tagai foi I lo matou fale o le taualuga o lo matou fale o loo faaaoga pa’u taavale ufiufi ai ae o le fola ole fale o loo faaaoga ai ogainu. ”
“O si ou to’alua e nofo i le fale e vaai le ma fanau ma fai feau masani o le aso ae o a’u ou te faigaluega. O lou totogi e maua i le vaiaso e $150 tala.
O lea seleni e ave ese ai lou pasese o le vaiaso ae o le isi vaega e faaaogaina lea mo le faatauina o taumafa ma isi lava vaega e manaomia e si ou aiga.”
“O a’u ua taua o le ulu o le aiga, o le tama foi o le aiga ma e tele lava se matafaioi o loo feagai ma au i le taimi nei ae ou te talitonu e le’o mafai ona ausia nisi o ia matafaioi I se tulaga maualuga ae o loo ou taumafai lava e faatino.”
“Ou te iloa ma malamalama lelei lava e leai se mea e maua gofie peitai ou te lei mafaufauina e faigata faapea.”