Manaomia le vai ma le eletise

By Aruna Lolani 27 February 2017, 12:00AM

O Alex Sefo o se taule’ale’a e 21 le matua o lona soifua o Fagaoali’i i Savai’i ae o lo’o nonofo o ia ma ona matua fa’apea ona tuafafine e to’alua i le taimi lenei i Nu’u Fou.

Na fa’aalia e Alex i le Fofoga o Samoa le faigata o le olaga mo i latou. 

E ala mai lea i le tulaga tau ile vai fa’apea le eletise. E le maua e lona aiga nei mea ma e le pau fo’i na o se itu o lo’o tigaina ai. 

Na fa’aalia e Alex le le lava o le latou tupe maua mo o latou mana’oga ma e tigaina lava i latou e galue mo a latou mea’ai. 

E tasi le tausaga talu na nonofo Alex ma lona aiga i Nu’u. Na latou o ese mai Savai’i talu ai o lona talitonuga o Upolu a e maua uma ai so’o se mea ae peita’i e le faigofie mea uma. 

“E tasi le tausaga talu na matou i nei. Sa matou i Savai’i ae na matou o mai ii nei Upolu ina ua Malaga atu le tina matua i atunu’u i fafo. 

O le tausaga na e tasi a’o latou nonofo i Nu’u,  o le umi na sa leai ai se vai po’o se eletise e o’o atu ia te i latou. 

“O le taimi nei, ia e le lava se matou seleni e totogi ai se matou eletise po’o le sua fo’i ole vai i le matou fale.

“E pei ole matou tau tiga a lea i aso uma e su’e ai se matou tupe.

Sa ia fa’alia atu ile Fofoga o Samoa e le faigofie i taimi uma le olaga i nu’u tua ae o se mea ua masani ai latou. 

“E le fa’apea e tutusa ai pea aso. O lona manatu fa’alia lea. 

“E iai a taimi lelei, e iai fo’i taimi e faigata ai. O le olaga lava e fa’apena ona suisuiga. 

“E lelei a Savai’i i le itu lea e matou te nonofo a matou i le matou fanua ma e maua fo’i le matou sa’olotoga. O le matou olaga i Savai’i , e tele na matou tua i mea e maua mai le fanua e ala mai i mea e maua ile fa’atoaga. E iai fo’i le matou vai ma le eletise. 

“Ae peita’i e iai fo’i lona eseesega tele ma le mea ua matou iai lenei taimi. 

O Alex na’o ia le alagatupe o le latou aiga. E faigaluega i Frankie Wholesale ae e le tele sana tupe maua mai iai. 

“O le tupe lea ou te maua mai i la’u galuega, e fa’aaoga i pasese ma mea fai a le aoga mo nai o’u tuafafine. 

Ae o le mana’oga lava o Alex mo lona aiga i lenei taimi, o le vai ma le eletise. 

E talitonuina fo’i e ia o le leai o se auala i isi mana’oga i le olaga o se tagata, o se itu mativa lea. 

“Matou te mana’omia lava le vai aua le faiga o matou mea’ai fa’apea le eletise aua le faiga o meaaoga a nai o’u tuafafine.

Na fa’aalia fo’i e ia ile Fofoga o Samoa le faigata ole tau sefeina o se seleni mo le fa’aolaina ole vai ma le eletise pe’a fa’apea e alu uma lana tupe maua ile tausiga o lona aiga. O lea e fia mana’omia ai e ia se fesoasoani maua mai i lenei itu mai le mamalu ole atunu’u.

“Pei ole mafua’aga lea ou te faiatu ai matou to matitiva.

“Ae o isi a mea, ia o lea e lelei uma ma faigofie.

A e fia fesoasoani ia Alex ma lona aiga i lona aioiga ua fa’aalia, o le numera lea e maua ai o ia: 2780560

By Aruna Lolani 27 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>