E sili lava le nofo i le aiga
Titi Matagi o se tama 23 le matua o lona soifua mai Falevao ma Aele.
O ia e lona tolu i le fanauga ma o lo’o galue o ia mo sona lelei mo le lumanai aemaise foi se lelei o lona aiga.
“E va’ai atu a i le au tupulaga i nei vaitaimi ua le toe fia faalogo, ua ta fiu foi e fautua atu i nisi pe le fia faalogo,” o lana tala lea ile Fofoga o Samoa.
“E leai ma ni suiga fou ua ou vaai atu ai.
“O au sa ou faigaluega i se kamupani mai Amerika Samoa.
“Atoa le tasi tausaga ma le afa sa ou faigaluega ai ae na taofia lou faigaluega ona e ese foi a uiga o tagata faigaluega sa ou vaai ai.
“O le aiga la ta te mapu ai ma o se mafuaaga foi na o loo ou tausi aiga ai.
“Ia o le galue a ile faatoaga le galuega fai i aso uma, ma o le taimi lea sa ou sau ai e avatu ni popo.
“E leai ma sesi o matou e faigaluega vagana ai lou tama lae e faigaluega i Tutuila ia ma lesi ou uso lae sauna lana malaga atu i fafo.
“A o matou a ma isi ou uso ma tuafafine, ia lea e matou tausi i le aiga aemaise ai foi si o matou tina.”
E iai foi popolega o Titi i le au tupulaga i nei vaitaimi.
“O le mea lea ua iai, ua toatele lava le au taumafa ava malosi ma le ulaula tapaa ae o lau a ia fautuaga, e sili ai pea tuu na aga faapena aua na o le leaga ai fua o le soifua maloloina ae faapea foi ona fa’apu’upuu ai fua le soifua.
“O aiga lava e maua ia manuia ma ia faamuamua lava.”