Fuafuaga ina ia taofia fe’ese’esea’iga

By Vatapuia Maiava 27 July 2016, 12:00AM

E le-fou fe’ese’esea’iga e tula’i mai i le va o tagata-lotu o nisi ekalesia i totonu o le atunu’u. E o’o lava i tulaga tau-Kerisiano, o le mea lava e tasi.

Moni o lo’o tapua’i ma tautua uma i Le Atua e tasi, peita’i o lo’o tula’i mai pea fe’ese’esea’iga nei ma finauga, po’o ai tonu e sa’o a’o ai e le-moni la latou tapua’iga. 

O ituaiga mafaufauga la nei, o lo’o taumafai atili ai le Fa’alapotopotoga o Tupulaga Talavou mo Keriso (le YFC), ina ia suia atoa. O le lu’itau numera tasi lea o lo’o feagai nei, o le taumafai ia tu’u-fa’atasia uma tagata Kerisiano, ina ia tasi. E maumaututu le talitonuga o le Fa’alapotopotoga lea, o le finagalo tonu lava lea o Le Atua Silisili-‘Ese mo lana fanau, ina ia tu’u-fa’atasia i le finagalo ma le tapua’iga e tasi.  

O le fe’au lea o lo’o tilofia i le mau-tau’ave o le Mafutaga Tatalo a Tupulaga Aoao, o le “Tasi le atunu’u e Tapua’i ma Vivi’i fa’atasi i Le Atua.” O le ‘autu o lea mafutaga, o le ‘ave’esea lea o fe’ese’esea’iga ma to’atuga o tagata ae o-mai fa’atasi tagata-lotu o ekalesia ‘ese’ese – o fanau uma a Le Atua e tapua’i fa’atasi ma ‘ave le vi’iga ia te Ia. 

O lea mafutaga tatalo o le faia i le Aso 02 – 06 o Aokuso i luma-maota o le maota o le malo, lea o le a ‘auai ma pepese ai le fa’aili lauiloa a le Katina Brothers i po mulimuli e lua; ma e leai se totogi. 

“O le fa’amoemoe ‘autu lea, o le tu’u-fa’atasia uma lea o ekalesia ‘ese’ese i lalo o le fu’a e tasi; ina ia tasi le atunu’u aoao i le Atua,” o le fa’aaliga lea a le Fa’atonu o le Polokalame, o Manasa Aloali’i i le Samoa Observer. 

“Ia ‘ave’esea fe’ese’esea’iga i le va o ekalesia ‘ese’ese, a ia tu’u-fa’atasi uma ona tupulaga ma tagata-lolotu uma i lalo o le fu’a e tasi.

“Tasi lava le Atua o lo’o tatou ‘au’auna ma tapua’i iai Samoa uma ma o Le Atua lava lea o lo’o fa’avae ai Samoa a’o nisi fo’i taimi, e fe’ese’esea’iga nei i le va o ekalesia, e vaemanua ai ma avea ma to’atuga i lo tatou soifuaga nei.

 “Lena, o le fa’amoemoe lava lea o lenei mafutaga, o le tu’u-fa’atasia o tagata uma ma tapua’i fa’atasi i Le Atua.” 

Ae talu ai fo’i le logologoa o le fa’aili a le ‘Auso Katina i Samoa nei, o le a atili mata’ina ai lea fa’amoemoe ona o le a ‘auai.

Na ta’ua e Manasa, e le faigofie le ‘aumaiga o le ‘aufaipese lea i Samoa nei, peita’i o lo latou fiafia tele ma le amana’ia o Samoa nei fa’apea le Alofa o Le Atua, ua mafai ai ona ‘auai mai.

“O le ‘auso lea sa soifua ane i Amerika Samoa; na ‘ou fa’alogo i nisi o tala e uiga ia latou; na maliu lo latou tina a’o laiti le vaega lea ma o le tasi lea o mafuaga o le fa’ananau e tu’u-fa’atasia latou mo le faia o le ‘aufaipese, o pese-lotu,” o lana fa’aaliga lea.

 “Ua mana’omia so’o le ‘auso lea e le Fale Pa’epa’e ma ‘ou te iloa, sa fa’afiafia ai ma pepese i le Aso 04 o Iulai.

“A silasila lava iai, o le ‘auso lea e le gata o se ‘aufaipese kerisiano mai Samoa, ae ua matua logologoa fo’i ma lauiloa i le lalolagi. 

“Ua matua fiafia lava ina ua iloa e o-mai e lagolago le fa’amoemoe lea mo tupulaga talavou. Sa talanoa fo’i le latou ta’ita’i, le susuga a Niel lea na ta’ua, ua fiafia lava mo lenei avanoa e fa’asoa ai mo tupulaga Samoa.

“Ua leva o talotalo mo se fa’amoemoe fa’apea i luma-maota o le fale o le malo, o la a ‘auai e fa’asoa mai le alofa ma le agalelei o Keriso. 

 “E fa’apitoa lava lo latou naunau ma le fiafia i tupulaga talavou o Samoa, ma o le mafuaga lea o le a fa’asoa mai ai fo’i fa’aleTusi-Pa’ia i lea fa’amoemoe, o se mea e seasea o’o iai ae maise o musika fa’aleAgaga o le a momoli mai ai le fe’au o le Talalelei ia Keriso.

“O le Aso Tofi, le Aso 04 o Aokuso, e faia ai sa latou fa’aaliga fa’apitoa e fa’asoa atu ai fo’i mo tupulaga talavou uma o lo’o a’oa’oina i le Iunivesete Aoao o Samoa, i le Papaigalagala.”

Na ta’ua fo’i e le Fa’atonu, e taugata tele totogi o latou nei pe a fa’afiafia i fafo, peita’i o le malaga mai i Samoa nei, o le a fa’afiafia ai mo uso ma tuafafine, o tama ma tina ae maise le atunu’u aoao, e leai se totogi. 

“Sa ‘ou fa’alogo e taugata tele le tau o le Fa’aili lea,ae na ta’ua e lo’u uso, e o’o lava i le pepesega i le latou falesa i Los Angeles, e USD$90,000.00 le tau,” o lana fa’aaliga lea. 

 “E le aofia ia o latou pasese, ae mo le po e tasi, e masani lava ona o’o i le USD$150,000.00.

“A’o lea sa o le a o’o mai i Samoa mo sa latou malologa, e leai se totogi o latou mo’omia ona o le alolofa tele ma le fiafia i tagata Samoa, lea o le a fa’afiafia-fua ai e leai se totogi.” 

E silia i le 30 tusi-vala’aulia mo fa’alapotopotoga a tupulaga ua mae’a ona tu’uina atu mo nisi e fia ‘auai peita’i ua tonu i le Pulega, ina ia tatala le avanoa mo so’o se tasi e fia ‘auai. E talia ma le fiafia so’o se tasi!

By Vatapuia Maiava 27 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>