Manatu O Le Fa’atonu - O Si’ufofoga mai le nuu

By Gatoaitele Savea Sano Malifa 27 August 2016, 12:00AM

O Ananafi, e pei ona outou silafia i le taimi nei, sa i ai se vaaiga fou i totonu o la outou nusipepa, o le Samoa Observer, na amata ai. 

Ua faaigoaina o le “ Si’ufofoga o le Nuu,” o lona faamoemoe-o le tuuina atu lea i sui o tagata lautele  o loo nofoina nuu e mamao ese mai Apia, le avanoa e talanoa mai ai e uiga i o latou soifuaga lautele faapea foi ma le faatinoina o a latou aia tatau e faaali sa’oloto ai e aunoa ma le faalavelaveina o latou manatu. Ina ia mafai ai-e le gata ina matou talitonu e matua taua lenei tulaga mo tagata uma latou te faaigoaina lenei atunuu o lo latou aiga, ae ia mafai ai foi ona faaaogaina e avea ma avanoa e saili ai ma le faaaloalo se fesoasoani mai lo latou malo, pe afai ua matua manaomia se fesoasoani.

O lea la tulaga ua faamanatu mai ai le Fono Lona Tolu Faava-o-malo e uiga i Setete Tau Ati A’e a Atumotu Laiti  (S.D.S.) lea sa talimalo ai le Palemia o Tuilaepa Sailele Malielegaoi i Apia i le aso 1 o Setema 2014, ma sa auai le Failautusi Aoao a Malo Aufaatasi o Ban Ki-moon.

Sa ta’ita’ina e le faaupuga, o “Leo o Atumotu, Filifiliga a le Lalolagi,” sa faailoa atu  e Mr. Ban Ki-moon i lana lauga i e na auai: “O la’u vaai i setete tau ati a’e o atumotu laiti e pei o se faa-ata e faa-lapopo’a ai ata o mea.

 “A tatou tilotilo la ia latou faa-ata e faa-lapopo’a ai ata o mea, o le a tatou iloa ai mea e sili ona tatou afaina ai o loo tatou feagai ai.

 “Ma o le ta’ua la o mataupu o loo feagai ma setete tau ati a’e o atumotu laiti, o loo tatou atiina a’e mea faigaluega tatou te manaomia e siitia ai le tulaga lelei faatumauina o le atiina a’e i le salafa o le lalolagi atoa.”

Na ia ta’ua foi: “Ua tatou auai iinei e sailia se noataga toe faafou e ala i le silasila taula’i i gaoioiga e mafai ona faatino ma faiga-paaga tumau.”

Atonu sa le iloa e Mr Ki-moon, ae ina ua na faamatalaina setete tau ati a’e o atumotu laiti e pei o se faa-ata e faa-lapopo’a ai ata o mea, ma na faamaninoina e faapea a tatou tilotilo i totonu o a latou mea vaai, tatou te vaaia tulaga pagatia o le a feagai ma i tatou uma,  sa talanoa tuu-sa’o o ia i le vaega to’atele o tagata o lenei atunuu o loo nonofo i totonu o nuu, ma ua loa tausaga o nonofo ai. 

O le asŏ ua tatou vaaia ai  tulaga e lamatia ai o loo faailoa mai ma le malosi i soo se nofoaga, ma e tusa ai ma faiga pi’opi’o tau faigamalo lea o loo faataga pea ona matua mata’utia i totonu o lenei atunuu-ua faapea ai ona faoa mai le toatele o latou sao e tatau ona latou maua, e peiseai ua manino mai ua matua leai lava se mea e mafai e se tasi ona fai e faasa’o ai nei mea.

Ae peitai, ina ua malaga atu faataamilo tusitala a le Samoa Observer i Falealili i le Aso Tofi o le vaiaso nei, na latou maua ai e faapea ua matua naunau lava tagata o le nuu e faailoa mai o latou manatu. 

Na lomia faasalalau i totonu o le “Siufofoga o le Nuu” ananafi, faamolemole faitau i ai ia latou tala, afai la e te lei faatinoina lea tulaga, , ona ta’u mai lea o mea uma e te manatu i ai. 

Sale ma Leata Petersen o Tafatafa.

Fai mai i latou o loo tumau pea ona fulitua le malo la “matou tagi atu mo se fesoasoani e toe fau ai lo matou fale.” Sa faamatala e lea ulugalii matutua e faapea o lo latou fale na faatama’ia e le Afā o Eveni i le 2012, ma i le taimi nei “ua latou fiu e faatali.  “O le vaega atoa i luma o lo matou fale ua alu ae faafetai atu ai le Afa Malosi o Eveni,”o le faaaliga lea a Mr. Petersen.  “Ua tuua mo i matou na o le vaega i tua o lo matou fale ma o le mea lena ua leva ona matou faaaogaina mai le 2012 e o’o mai i le taimi nei.

 “Ua loa ona matou fesoota’i atu i alii ofisa o le malo ia o loo gafa ma nei ituaiga o faafitauli ae o le latou upu ia i matou ina matou onosa’i, o loo latou galulue i lea tulaga. “Mai le 2012 e o’o mai nei i le 2016, ma tilotilo i le tulaga o lo matou fale? E le o i ai lava se tulaga faalele ma e o’o mai i le taimi nei, pau lava le mea o loo ta’u mai e le malo –ia matou onosa’i.”

Fai mai Mrs. Petersen ua fa tausaga o latou onosa’i e o’o mai i le taimi nei ae foliga mai o le latou talosaga mo se fesoasoani –ua fulitua i ai le malo. “Ua matou vaaia nisi o fale mananaia ua tulai mai e faitau miliona tala le tau ae matou fesili atu i isi tagata ae fai mai na fau e le malo,” o le faaaliga lea a le tamaitai.”

 “O lo matou fale e le alu ai se latou $50,000 tala ae ua fa tausaga o matou faatalitali pea.”

Afoa Aliva o Tafitoala, Safata. O lona manatu e faapea o noatagata tau Ekalesia, o le pogai lea o le mativa. Fai mai a ia e le o se mea e tau faaliloina le faapea o ekaleseia i totonu o Samoa o loo latou umia le tele o le malosi o tagata, ma o le tulaga lena o loo i ai i totonu o se malo e faapea o loo faavae i le Atua.  “Ae a o’o ina faaaoga sese e ekalesia lea una’iga malosi; o lona uiga-o le taimi lena tatou te iloa ai ua tatau ona tatou toe la’ala’a i tua.” Fai mai a ia e iloa-gofie lava lea tulaga i le tele o taimi i Samoa, o nisi o aoaoga e faatauaina e nisi o failauga e faatῡtῡ i le foa’i atu i le ekalesia, tusa lava pe latou te iloa e faapea o le toatele o loo filo ia latou lafu-o loo tauivi. O se faifaatoaga e tusa ma lana galuega, fai mai Afoa o se tasi lenei o mafuaga ua pagatia ai i latou o loo nonofo i nuu i tua. “E anoano aiga i nuu i tua e pei foi o lo’u aiga ua leai ni tagata faigaluega o latou aiga,” o le itu lea na ia faaalia. “Ua na o a’u ma lo’u to’alua ma le ma fanau o loo a’o’oga. E leai se tasi o i latou ua i’u lana a’oga.

 “O le tele o a matou tupe e alu i le faaaogaina talu ai ua ma tuuina atu le faamuamua i le aoaoina muamua o i latou. I totonu o nei nuu i tua-e anoano mea e alu ai tupe e pei o mea e fai a le nuu. 

 “Ae o tupe e tuuina atu i mea fai a le nuu e le mafai ona faatusatusa  i tupe e alu i le ekalesia; o le fua faatatau e 1:10. 

Na ta’utino e Mr. Aliva e faapea o le soifuaga i totonu o nuu i tua e mafai ona faigata i taimi faatasi ai ma le anoano o ana tupe e alu i le tele o mea eseese e le tatau ai. “E alu Tupe i mea mo le nuu aemaise ai lava o mea mo ekalesia,” o lana faaaliga lea. “O le a ‘ou toe ta’ua mea na ‘ou ta’ua muamua…..o tupe e alu i mea fai a le nuu e le mafai ona faatustusa i tupe e alu i ekalesia.

 “E  mafua lenei itu ona o mea fai a le nuu e le o ni mea e masani ai, ae mo le lotu, sole, e leai se ekalesia e leai ni ana sauniga faale-ekalesia. “I tami ou te tatalo ai i le Atua-ou te fesili pe sa’o lenei mea. “O le fatu o le mataupu e faapea ua matua anoano mea e fai a le ekalesia ma o le pogai lena ua pagatia ai le nuu.”

“E leai se Mativa i Samoa ?”

 Sa faaali foi e Nive Tulaga o Poutasi ma Falealilii  le tala o lona aiga: O loo i ai tamaiti e faatau atu oloa i soo se nofoaga; tagata aisi  i luga o le alatele ma afai e faaalu se tasi o se tasi e alu atu i lana taavale i nuu i tua, o le a e silafia ai-o le mea moni-o loo i ai tagata o loo soifua i lalo ifo o le laina o le mativa.

O le tulaga o le soifuaga i totonu o le nuu ua matua faigata lava ona faafoe. Fai mai Nive ua na maua e faapea o le tausi o lona tina matua, ma tuu atu lana fanau e to’alima i le a’oga e tusa ai ma tupe o loo onamau mai le faatauina atu o fua o lana faatoaga itiiti, ua matua faigata ai lava ona matou ola i aso uma. 

“O le Soifuaga i nuu i tua e faigata,” o lana faaaliga lea i le Samoa Observer.  “Ou   te le o toe faigaluega i le taimi nei ona ua talosagaina a’u ou te sau iinei e vaai le aiga, ae i le taimi nei-o loo o’u taumafai e saili se isi galuega e fesoasoani mai i mea uma iinei i le aiga. “Matou te manaomia tupe e fesoasoani i le olaga i aso uma; O loo i Apia la’u tama laititi o ia lea o loo faigaluega ae tatau lava ona latou lagolagoina lo latou lava aiga, ae mo i matou-o lea matou te tauivi.

 “Ua ia i matou pili o a’oga a matou fanau ma ua matua taugata lava, aemaise ai lava pili o le School C ma le S.S.L.C.”

E ese ai mai le le mafai ona maua o soo se tupe lelei, sa ta’ua foi e Mrs. Taulaga e faapea o le tau o le soifuaga ua matua maualuga tele ma o oloa i faleoloa ua si’isi’i pea i luga le taugata. “O le tau o le soifuaga ua matua maualuga tele i aso nei,” o le faaaliga lea a le tamaitai. “A leai sau galuega-o lona uiga-o le a le ‘a’ai lau fanau. E faapena le Faigofie; i le taimi nei-o loo matou nonofo i luga o la matou faatoaga ma o le matou punavai foi lea e maua ai tupe.” “E anoano mea e fai iinei i totonu o le nuu ae matou te le o iloa poo fea e mafai ai ona matou maua se tupe e fai ai ia mea uma.” E faigata le soifuaga i totonu o le Nuu, o le faaaliga lea a le Tina Matua o Faatolu Seinafo o Siumu, ua 62 tausaga lona matua.

Na ia faailoa mai i le “Si’ufofoga o le Nuu” e faapea o le soifuaga i totonu o le nuu e le faigofie e pei o le soifuaga i totonu o le taulaga.

A tatou talanoa e uiga i le mativa ona tatou ta’ua lea o tupe, talu ai-o le tupe o mea uma ia ma o lea e faigata ai le soifuaga pe a pa’ia le itu tau tupe,” o le faaaliga lea a le tamaitai.” “O le itu i lo tatou aiga e na o le toatasi lava le tagata o loo faigaluega ma o ia lena o lo’u atalii o loo faigaluega i le Sinalei Resort.” “O lona totogi o loo fesoasoani ia i matou e totogi  ai se tasi o le fanau a lona uso ona sosoo ai lea ma noataga faale-lotu faapea foi ma mea fai a le nuu.

 “Ae ui o lea, o mea fai a le nuu –matou te mafai ona fai ae o le ekalesia ma le a’oga, o iina tonu lea matou te pagatia ai. “E toatolu le fanaua a la’u fanau ia o loo a’o’oga i le taimi nei ma latou te manaomia uma tupe mo le resitalaina, ona soso’o ai lea ma le popole ia latou mea’ai e ave i le a’oga ma mea fai a a’oga ia foi e manaomia ai matua ina ia avatu ni tupe mo a latou tausala. 

 “Ua matua faigata tele ona o nisi taimi ou te faaseā i faia’oga e le mauoloa uma ni aiga ae o lea latou te tapā tupe mo lea mea ma lea mea ae latou te le o iloa le faigata pe faapefea ona ola le aiga. “Fai mai Ms. Seigafo e le gata i le a’oga ae faapea foi ma ekalesia.  “Ua ‘ou iloa e faapea o lenei faafitauli e le na o se nuu e tasi o tupu ai ae o loo tupu i totonu o nuu uma ma i tagata uma.  “I nisi taimi ou te manatu ua sili ona tatou popole tele pe faapefea ona tatou tuuina atu mea i le ekalesia-ae o le taunuuga-o i tatou lava e pagatia ona o lo tatou le iloa pe o le a faapefea ona fafaga o tatou aiga. “O le faafitauli lena e le o iloa e le malo se mea e uiga i le soifuaga iinei i nuu i tua, ua noatia i nofoaga uma ma o ia noataga uma o loo manaomia ai lo tatou tuuina atu tupe.”

Ina ua fesiligia pe o le a sona manatu i le mea e tatau ona fai e le malo, fai mai Ms Seinago-o i latou (malo) e tatau ona matua tulai mai ma ni faiga e fesoasoani ai i nuu i tua. 

 “O lenei faafitauli o loo iinei ae le o i totonu o le taulaga,” o lana faaaliga lea

 “E tatau ona mafai ona fai ia i tatou e pei ona fai i tagata i Apia ae foliga mai o loo sili ona faatῡtῡ le vaai a le malo i le atiina a’e o Apia i lo le faatauaina foi o i matou. Matou te manaomia le fesoasoan i soo se auala, matou te le o fai atu ia i latou e aumai fua ni a matou tupe ae o lea matou te matua aioi atu ia i latou ina ia tuuina mai nisi avanoa mo a matou fanau e galulue ai ina ia mafai ai ona latou tausi lo matou aiga. 

 “O le mea tonu lena o loo matou talosagaina ai se fesoasoani e tuuina mai ai ni avanoa mo tupulaga talavou aua o i latou ia o loo tausia lo matou aiga. “Ua matou iloa e faapea o le tau o le soifuaga ua ua roketi i le vanimonimo ae o le tulaga lava lena i ai, ae a itiiti mai-o se fesoasoani lea i tagata o Samoa muamua ae le’i faia sau iloiloga e tuuina atu ai se fesoasoani i isi.” 

Ia-o le a la sou taofi?

E tatau i le malo ona fesoasoani atu? 

Ua ia te oe se vaifofo? 

Afai ua i ai, faamolemole ia faasoa atu i le toatele. 

 

(Faaliliu e Seagaitumua Tupuola)

By Gatoaitele Savea Sano Malifa 27 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>