Fa’amuamua e Tevita ona mātua

By Deidre Tautua-Fanene 28 February 2018, 12:00AM

O le tautua ai mo ona matua o le itu lea o lo’o fa’amuamua e Tevita Tupa’i, tusa lava taofi ai fuafuaga o lona olaga.

O lenei taule’ale’a ua 35 le matua o le soifua mai le afioaga o Nu’usuatia, Safata, o ana galuega masano o le alu lea i le fa’atoaga, tapena le fale, fai tagamea ma le gaseseina o mea’ai taumafa a ona matua.

Ina ua maua atu e le Fofoga o Samoa Tevita o lo’o fa’amamā mai lana tagamea ma tautau i fafo i le la.

“O nai o’u matua o la’u matafioi muamua lava lea,” o lana saunoaga lea i le Fofoga o Samoa.

“E ui lava o lo’u naunautaiga o le fia maua lea o se galuega, ae o le usita’i lava o le itu pitoisili ona taua i le soifuaga o le tagata tusa lava po’o le a le matua i fea.”

Sa fa’asoa mai fo’i e Tevita mafatiaga o lo’o feagai ma lona aiga i totonu o le latou nuu.

“Matou  te fa’alagolago i le fa’atoaga, ae talu ai le afā o Gita o lea ua fa’afaigata ai lava le olaga.

“Matou te le mana’omia ni mea’ai, a maua lava le fa’alifu fa’ai ma le talo ma le ti e pei lava o lo’o ‘ai le falai moa.

“O lea e matou te maua lava mea’ai i aso uma e ala mai i mea totō.

“Pau le tulaga lea e iai o le lē lava o le itu tau seleni e fausia ai se fale lelei.

“Matou te nonofo fa’atasi uma lava i le fale e tasi ma o’u matua, o lo’u tuafafine ma lona to’alua ma le la pepe.

“Ae e pei ona e silasila mai ai e leai se manaia o le nonofo fa’atasi uma, e leai se potu, po’o ni fa’amalama.”

Sa iai lana talosaga sa fai mo so’o se tasi o mana’omia se tagata faigaluega.

“Ua ou malie lava ou te faigaluega mo soo se tagata fai pisinisi lava, ou te le mana’omia se tupe, pau le tulaga ou te mana’omia o le fia maua lea o ni simā, fao, laupapa, apa ato fale ma se fale le ta’ua lelei mo a’u ma lo’u aiga.

“O le fale le ta’ua lea o lo’o iai e leai se tane, o lo’o lelei le suavai, ma le tino atoa o le fale ae pau le tulaga lea e mana’omia o ni simā.

“Ua ala ona fa’atuai le fausiaina ole fale ona o le le lava o le itu tau seleni e fa’atau mai ai mea e mana’omia.

“Sa ou sefesefe lava mo se ipu o le fale le ta’ua lea sa mafai ai ona fa’atau mai i le tausaga na te’a nei o se meaalofa mo nai o’u matua.

“Ae e le’i mafai ona faia ona o le leai o ni simā e fai ai.

“O le to’atele o isi tagata e fa’atau mai fagu fa’amanogi, lavalava, seevae, ae o le mea taua lea o lea e mana’omia e le aiga o se fale lea,

“O le mafuaaga lea na ala ai ona ou fa’atauina mai .”

Sa fa’ailoa fo’i e Tevita, o lona tinā e tele ma anoanaoa’i ana ipu, ae ona o le leai o se latou umukuka o le mafua’aga lea latou te a’ai ma momoe ai lava i le fale e tasi.

“Matou te a’ai ii ona tapena mama lea, fa’atoa fofola ai a matou fala moe ma matou momoe ai.

“E ese le fa’amomoi loto o le va’ai atu i le tulaga o lo’o soifua ma ola ai o’u matua aemaise ai lava o le tau fa’aofiofi ai i lenei tama’i fale.

“Ae ui i lea o lea lava e taumafai atu, ma galue malosi ina ia iai se aso e fa’a’manuiaina ai matou aemaise lava nai o’u matua i se fale lelei.”

Afai e te fia fesoasoani ia Tevita fa’aseso’otai numera nei 7253348 or 7641084.

By Deidre Tautua-Fanene 28 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>