Ia iloa ona ola alofa ma ola faaeteete

By Aruna Lolani 28 May 2017, 12:00AM

Ua iai nofoaga ua uma ona faatulagaina mo le lafoa’i ai o lapisi ua le toe faaogaina e le atunuu, ae o le afioaga o Leauva’a ua avea nei ma se tasi o nofoaga ua fai ai le le alolofa o nisi o le atunuu.

O le tama ia Kirisinasi Silivelio, 49-tausaga le matua ua ia maitauina le siisii i luga o le manogi leaga (tulou) i lea nofoaga ae le’o se nofoaga mo lapisi.

“Ua maitauina lava le toatele o i latou e faia le amio lea o le lafoai o lapisi i lea nofoaga ma ua atili ai lava le manogi leaga (tulou) e le’o se tulaga lelei lea mo le soifua maloloina o se tagata soifua,” o lana tala mai lea i le Fofoga o Samoa.

“Mo le silafia e le na’o se tasi se aiga o lo’o nonofo i lea nofoaga e toatele ae o le tulaga le manuia ua tupu ua lafoa'i le tele o lapisi i lea nofoaga ma o se tulaga e le manaia lea tulaga."

“Na fai le fono a lo matou nu'u ma fai ai fo'i faasalaga i se tagata na te toe faia lea tulaga ma ua faamalosia foi.

I le va'ai mamao a le tama e tele le avanoa e mafai ai ona maua ai se faama'i ona e afua ma i'i lea nofoaga ma tele ai le aafiaga o aiga o lo’o nofo lata iai.

“O le va'ai alofa lava i aiga aemaise o fanau ma lo latou ola tuputupu a’e mo le lumanai ma aso o i luma.

“Ma o le galuega lenei e le’o se galuega a se tagata se to'atasi o le galulue faatasi lava e mama ai le avega.

O le manatu o le tama e le’o tagata o le nu'u e faia lea tulaga o isi tagata ese mai isi nuu.

“O le tulaga le manaia lena” o lana tala mai lea.

“Atonu e faifai a maua ma atonu e vave maua lava i latou ia o lo’o faia lea tulaga le alofa.

O lana mau, ina ia utagia e le mamalu o le atunu'u lea nofoaga ina ia avea ma nofoaga faasao mo le afio'aga i aso o i luma.

“A tatou iloa puipui e manuia a mea uma ma e le tutupu ai lava nisi tulaga le manuia mo le lumana'i aemaise fanau."

By Aruna Lolani 28 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>