Lē-gagana le Ta’ita’ifono i le Su’esu’ega o faia nei

By Lanuola Tusani Tupufia 28 July 2016, 12:00AM

E matua le-magagana le Ta’ita’ifono o le Komiti Fa’apitoa a le Palemene o lo’o su’esu’eina galuega a Fa’amasino o le Fa’amasinoga o Fanua ma Suafa, i le tulaga ua o’o iai taualumaga o lea Su’esu’ega. 

Ina ua fesiligia e le Samoa Observer, le Faipule mai Vaisigano Numera 1, o Lopao’o Natanielu Mua mo sana fa’aaliga ananafi, ae saunoa, e le mafai ona fa’aalia sona finagalo. 

 “E naunau lava le loto ma fia tautala atu e uiga i le su’esu’ega o faia nei, ae pau lava o lea, ua noatia lava a’u nei – luga ma lalo ona o le tulafono,” o le saunoaga lea a Lopao’o. 

“E le fa’atagaina a’u nei i lalo o Tulafono Tumau a le Maota, e fai atu se tala e uiga i lenei Komisi ma afai ae ‘ou le-usita’ia, lona uiga ua ‘ou soli le tulafono.” 

Sa fesiligia Lopao’o pe moni o lo’o tete’e Fa’amasino o le Fa’amasinoga o Fanua ma Suafa i lenei su’esu’ega, ae sa le-fia fa’aalia sona finagalo. 

Ae na ia fa’aalia, ua matua tumu lava e tau i le fa’ai’uga o le masina” le fa’asologa o nisi o sui o le atunu’u e fia fa’aalia ni o latou finagalo ma tu’uina atu a latou talosaga i le Komisi. E o’o i le 10 i le po o fa’asolo pea talosaga ma finagalo fa’aalia e tu’uina mai.” 

Na fa’aopoopo mai fo’i, o le vaiaso fou ua fa’amoemoe e malaga ai i Savai’i e fa’afofoga fo’i i finagalo o sui o le atunu’u o lo’o i le motu-tele.

O lo’o fuafua e tu’uina atu ripoti o su’esu’ega ma mau uma a le komiti lea, a’o le’i amataina taualumaga a le Palemene ia Oketopa o le tausaga nei lava. O lo’o fuafuaina fo’i e tali atu le Matagaluega o Fa’amasinoga i ia ripoti ma su’esu’ega, i le masina o Novema a’o le’i talanoaina e le Palemene i ana tauaofiaga ia Tesema. 

A’o ananafi lava – e moni sa le-fa’atagaina sui o le Komisi Su’esu’e e talanoaina taualumaga o le Su’esu’ega, ae sa matua fiafia nisi o le mamalu o le atunu’u e fa’asoa mai o latou finagalo sa fa’aalia. 

O se tasi o molimau sa ‘auai i Tuana’imato i le aso ananafi, sa talanoa aga’i i le mau tigā ma fa’atiga-ulu  na feagai ma suli o le Suafa Fualau o Lotofaga, ona o fa’ai’uga a le Fa’amasinoga o Fanua ma Suafa na fai.

O Fualau Sililo Fualau ma ana lagolago o Sauiao Atonio Fualau ma Lagaia Masi Levi sa tu’usa’o lava la latou mata’upu i le Komisi ananafi.

Na ta’ua e Fualau Sililo, o lona tua’a o Fualau Paulo, sa umia le suafa i le 1951 ae na maliu i le 2007.

Peita’i na fa’aalia e Fualau, o le fa’ai’uga a nisi o fa’amasino, ua matou momotu atoa ai lava lo latou pi’itaga ma so’otaga i le suafa, o le meatotino a latou e aia iai.

 “O le fa’ai’uga lea a Fa’amasino ua matua afaina ai a’u nei ma suli uma o le suafa,” o le tala-fa’anoanoa lea a le toea’ina ua 68 tausaga o le soifua.

“A matou le-finau nei i le aso, o le a te’ena ai lava a matou fanau mai o latou tupu’aga ma lo latou fa’asinomaga…o o matou matua sa umia le suafa ma e iai fo’i la matou aia e umia ai le suafa peita’i ane, ua ‘ave’ese atu ma matou nei ona o fa’ai’uga sese, fa’ai’uga fa’aitu’au, lea ua matua luluina ai ma suia fa’avae o le matou aiga.” 

Sa toe fa’aopoopo mai fo’i Fualau, o fa’ai’uga palapalā nei ua tiga ai tele ma afaina lona aiga.

“Ua leai se fa’amoemoe o a matou fanau ma a latou fo’i fanau, pe a matou le faia iai o se fa’atatau…na matua manino lelei fe’ese’esea’iga a Fa’amasino sa faia le matou mata’upu ma o le mafuaga lena na te’ena ai la matou talosaga, e toe iloiloina le matou mata’upu. Ae iai ‘auala a Le Atua ma o le a fa’aalia lava le mea-moni i lenei Komisi Su’esu’e.”  

Na fa’aalia fo’i e le isi matai, o Lagaia, o taumafaiga a le aiga lea ia toe iloiloina le latou mata’upu, sa matua te’ena lava e se tasi o Fa’amasino. 

Sa ia fa’ailoa fo’i, o le fa’amaoniga o lo latou “so’otaga tau-toto” lea, o lo’o iai lea i suli o lona aiga o lo’o soifua pea ma fa’aaoga le suafa tonu lea ma suafa o matua o matua ua tofafa i tu’ugamau. 

“’Ou te fa’afetai atu lava i le Ali’i Palemia i lona faia o lenei Komisi,” o le fa’aaliga lea a Lagaia.

“Ua gugulu ma fa’anoanoa lo tatou atunu’u ona o fa’ai’uga-fai a Fa’amasino, ua oia ai ma avea o latou so’otaga tau-suafa ma aiga ma lepetia ai fa’avae o aiga ma nu’u.” 

O le isi vaega o matai sa tu’uina atu fo’i la latou talosaga i le Komisi Su’esu’e ananafi, e mai le afio’aga o Falefa.

By Lanuola Tusani Tupufia 28 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>