Mana’omia se galuega

Tusia Ulimasao Fata ,

32 Hits

Lealali Lealali, 21, tausaga le matua o lona soifua mai le afioaga o Faleula.

Lealali Lealali, 21, tausaga le matua o lona soifua mai le afioaga o Faleula.

O le faigaluega ma maua le seleni, o le a le gata ina fa’afaigofie ai mea uma aemaise o le a suia ai foi le naunau o nisi.

O le saunoaga lea o le taule’ale’a ia Lealali Lealali, 21, tausaga le matua o lona soifua mai le afioaga o Faleula.

O lo’o ia aga’i atu I lana ma’umaga au asana galuega I le aso ananafi lea na maua ai foi ma le avanoa a le Fofoga o Samoa e fa’atalanoa ai foi o ia.

Na fa’aalia e Lealali o ia e le’o faigaluega nei ae na’o le pau lava lana galuega o lo’o faia nei o le tausiga lea o lana fa’atoaga.

“Out e le’o faigaluega I le taimi nei ae pau le galuega o lo’o ou faia nei o le galueina lea ma le tausiga o la’u fa’atoaga ma o la’u masani lava lea I aso uma.

“E le fa’ataua ni mea o le fa’atoaga aua se seleni na’o le pau le auala o lo’o fesoasoani mai ai le ma’umaga I le matou aiga o le maua mai lea o meamata aua le fofoga taumafa a le aiga.”

Na ia saunoa foi e na’o le to’atasi lava le o lo’o faigaluega I totonu o le latou aiga ae na’o le pau foi lea o le auala o lo’o maua ai se seleni a si o latou aiga.

“Na’o lo’u Tama lava o lo’o fa’apena ona faigaluega I le matou aiga ia na’o le pau foi lea o le auala o lo’o maua ai le seleni a le matou aiga.

“O la’u galuega foi la lea ou te ala usu mai ai I le ma’umaga I aso uma o la’u lea fesoasoani I le matou aiga ona o lea e leai sa’u galuega o iai I le taimi nei.”

Na ia fa’aalia foi I le Fofoga o Samoa o lo’o ia naunau lava ia saili sana galuega ina ia fa’afaigofie ai mea uma mo ia aemaise lona aiga.

“O le olaga lea ua iai nei I Samoa ua matua faigata lava ae talitonu foi o le maua ai o le galuega o le a fa’afaigofie ai foi mea uma I le itu tau seleni.

“A fa’apea e maua se galuega ua fa’apena loa ona fesoasoani I lo’u Tama I le tausiga o si o matou aiga ona ua taugata lava le olaga ua iai nei Samoa I lenei vaitau.”

Na fa’aalia foi e Lealali o le maua ai o se galuega o le a suia ai naunautaiga o lona mafaufau.

“Pau le naunautaiga lea o lo’o iai nei na’o le usu mai lava e galue le fanua ina ia iai se meaai a le aiga e maua mai I le fa’atoaga pau lea.

“Ae a fa’apea e maua se galuega o le a suia le naunataiga ona o le taimi nei e pule lava a’u I le taimi e usu mai ai ma le taimi e foi ai galuega, ae a maua le galuega ua le toe iai nei tulaga ona e fa’atapula’a taimi aemaise tulafono e ao ina usitaia.”

Na ia fa’aalia foi lona naunau lea e sailia sana galuega ona ua lata mai foi aso fiafia.

“O lea e fia naunau e saili se galuega I se taimi vave lava ona o lea foi ua o’o mai aso fiafia ia e lagona lava le fia fai seleni ina ia mafai ona fai mea o lo’o naunau iai le loto.”

© Samoa Observer 2016

Developed by Samoa Observer in Apia