Fiafiaga mo fanau a Lotofaga Safata

By Vatapuia Maiava 28 December 2016, 12:00AM

O le to’atele lava o fanau  aemaise o Aoga Aso Sa i le tele o afio’aga ta’itasi na ‘ese’ese uma lava tafaoga na aga atu ai aua le fa’ai’uina o lenei tausaga.

Ina ua afea e le Fofoga o Samoa fanau o le afio’aga o Lotofaga Safata, na fa’ailoa ai e le Susuga i le Fa’afeagaiga i a Feata Perelini o le tausaga lenei ua manana’o fanau ina ia fa’aaoga momi tetele (castle trampolines) mo a latou ta’aloga.

“Ia o le tele lava o tausaga e alu tafaoga a le fanau i si o matou pito i tuā nei.” Rev. Feata Perelini i le Fofoga o Samoa.

“Ae o lenei tausaga, ia na tu’u ai le avanoa i nai fanau, ia o lo latou manaoga lenei, e fia aumai momi tetele nei  e pei na o Apia e va’aia ai , ina ia ta’a’alo ai fo’i latou i tua nei i Safata.

“O lenei la na faia ai lava le manaoga a fanau, ia lea e pei ona outou silasila mai, ia o le mea e lelei i fanau i Apia ia e lelei foi mo fanau i Safata.

“Ia o nei tapenaga uma e pei ona i ai la latou bbq, o ta’aloga, o momi tetele nei mo a latou ta’aloga ma nai ata o lo’o ki e matamata ai, ia o le agaga maualuga ia fa’ataunu’uina uma o latou manaoga. Na ia fa’ailoa i le Fofoga o Samoa o se fiafiaga tele i le fanau mo le taimi muamua le o’o atu ai o momi tetele nei  mo i latou.

“Ia e pei ona outou maitau mai ai, ia e le’i malamalama lelei le taeao ua leva na omai fanau e talia le taimi e o’o mai vaega nei mo i latou. “Aua ua na’o le lima itula o le asō o lo’o matou fa’aaogaina ai lenei momi tele ma o le agaga fa’afetai tele lea fo’i i nai matua.

“O le tele o tausaga ia e alu tafaoga ae o lenei tausaga ua filifili ai fo’i tamaiti i lea fo’i faiga fou.

“Ia o lea le agaga o lenei fo’i vaitau o aso fiafia e le gata mo le to’atele ae pei o tamaiti lava ia maua le fiafia.

“Atonu ua fiu fo’i nai tamaiti e ta’e’ele i le sami ma vai i tua nei, ia ae pei o lea ua va’ava’ai atu oka se fiafia o lenei aso mo i latou.

“Ua fiu e tau vaovao, ia ma o se taualuga fo’i lenei o galuega i lenei tausaga aemaise o le tausaga fa’aleaoga Aso Sa a le fanau.

“E talitonu le agaga ia o lo’o tau fai maua e fanau uma i Samoa le manuia ma le fiafia i lenei vaitau o le fa’amanatuina o le fanau mai o le pepe o le Kirisimasi ma le Tausaga Fou.

By Vatapuia Maiava 28 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>