E le faigofie le nofo vavamao ai ma aiga, uo aemaise lava i le vaitau lenei o le kerisimasi.

Ae mo fanau o loo aumau i Saina ona o aoaoga, o le maua o le avanoa e mafuta faatasi ai ma nisi o tuagane ma uso mai Samoa ua tau tuuitiitia ai le manatu mai I Samoa nei.

Na taua e le susuga ia Raymond Schuster o loo iai nei i Saina ina ia faau’u mai i le faailoga o le Tekeri mai le Iunivesite o Huagong Chemical I Beijing (Master’s Degree in Huagong Chemical University in Beijing).

“O le faigata ona e le faamanatuina e  Saina le fanau mai o le Pepe o le Kerisimasi. Ma o le lē maua ai o se mafutaga ma aiga i Samoa, o se itu e faigata tele mo i matou ona o aso faapea e faatasia uma ai aiga Samoa”.

“O le maua ai o avanoa matou te mafuta ai ma nisi o uso ma tuafafine mai Samoa o loo aotauina i Saina o se itu e faafiafiaina ai uma lava i matou”.

O nei faatasiga a fanau Samoa e faatautaia lava i tausaga uma lava.

O le susuga ia Raymond ua lima nei tausaga talu ona tuua e ia Samoa ae aumau i Saina mo lona faamoemoe ia faau’u mai ma lona faailoga I le Univesite I Huagong.

“Moi matou o le matou tausaga mulimuli lenei, ua avea foi lenei faatasiga e matou te faamalosiau ai nisi o fanau o le a faaauauina pea a latou aoaoga”.

“E le faigofie lou aumau ai i nei atunuu”.

“Avea lenei avanoa e faamanuia atu ai le Kerisimasi ma le tausaga  fou i o matou aiga ma uo o loo i Samoa”.

“O le tatalo ia outou talosia mai i matou ia outou talosaga aua le saunia atu ai mo suega faaiu o lenei tausaga”.