Una’i tama’ita’i e filifili galuega i Feso’ota’iga ma Fa’amatalaga Tau- Tekonolosi

By Deidre Fanene 29 April 2016, 12:00AM

O ananafi na fa’amalosi’au ai le Minsita Lagolago mo Feso’ota’iga ma Fa’amatalaga Tau Tekonolosi, o Lealailepule Rimoni ‘Aiafi, i tama’ita’i-talavou o Samoa, ia va’ava’ai ananoa faigaluega i vaega tau-feso’ota’iga ma fa’amatalaga tau-tekonolosi (ICTs).

O le saunoaga lea a Lealailepule, i le fa’amanatuga i Samoa nei, o le Aso Fa’ava-o-malo mo Tama’ita’i i Feso’ota’iga ma Fa’amatalaga Tau Tekonolosi (ICT) sa faia i le Maota o Tui Atua Tupua Tamasese ‘Efi i Apia. 

O lea fa’amoemoe sa tapena e le Iuni o Feso’ota’iga Fa’ava-o-malo (ITU) ma Malo Aufa’atasi, ma sa fuafua mo le fa’amalosia ma una’ia tupulaga teine, tama’ita’i ma tina-talavou, e sa’ili avanoa ma aga’i e galulue i ia vaega. 

I Samoa lava, na tapenaina e le Ofisa o le Pule Fa’atonu, se mafutaga fa’aleA’oa’oga e tasi le aso, mo teine-a’oga uma mai Kolisi i totonu o le atunu’u. 

O lea polokalame sa aofia ai se tauvaga Tusiga Ata, o tauvaga o le faia o fe’au-tusitusia i luga o telefoni-fe’avea’i, o Tauvaga Lauga ma Taliga-fesili o mata’upu lava tau Feso’ota’iga. 

Na fa’ailoa e le Pule Fa’atonu, o Unutoa ‘Auelua Fonoti, ua ‘ave le fa’amuamua a le malo e una’ia ai tupulaga-teine, o tama’ita’i ma tina-laiti, ia aga’i e ave mata’upu talafeagai e mafai ai ona galulue i galuega tau-feso’ota’iga ma fa’amatalaga tau-tekonolisi.

“I fa’amaumauga mai le Vaega o Feso’ota’iga, o lo’o iloa ai, e laititi lava se numera o tama’ita’i o lo’o galulue i le vaega lea ae maise fo’i, e le-to’atele ni tama’ita’i e fiafia e fa’aaoga ‘au’aunaga tau-feso’ota’iga ma fa’amatalaga tau-tekonolosi ua iai nei,” o lana fa’aaliga lea. 

“I isi fa’amaumauga mai le Vaega o Feso’ota’iga, o lo’o fa’aalia ai, o le 30 pasene o tagata faigaluega a malo i le lalolagi, o lo’o avea ma Ofisa fa’apitoa o Feso’ota’iga nei Fa’aTekonolosi, o tama’ita’i. Lona uiga, e 70 pasene atoa lava o tamaloloa, e 19 pasene e Pule Tama’ita’i, lona uiga, e 81 pasene o ali’i.

“I Samoa lava ia, e i lalo ifo o le tasi le pasene, o tama’ita’i o lo’o avea vaega tauFeso’ota’iga ma a latou galuega ma o se numera e matua la’ititi.”

Na fa’aopoopo mai fo’i Unutoa, e lelei tele totogi o galuega ia.  

 “O le tausaga ua mavae, na fa’atino ai se su’esu’ega e le Vaega o Fa’amaumauga ma na iloa ai, o tagata-inisinia ma tagata e galulue i galuega nei Tau Feso’ota’iga ma Fa’amatalaga Tau Tekonolosi, e aupito totogi tele nai lo isi galuega i totonu lava o Samoa. O le tasi la lea mafuaga, matou te taumafai atu ai, e una’ia tama’ita’i i galuega nei.” 

By Deidre Fanene 29 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>