Talanoa taiala mo atina’e

179 Hits

O le faagasolo ai o Polokalame a le Matagaluega o Tina ma Tamaitai, Atinae o Nuu ma Agafesootai aua le faatalanoaina o Taiala mo Atinae o Itumalo, ua oo atu ai le faasologa i le Itumalo o Gagaifomauga Numera 2. 

O lea itumalo e aofia ai afioaga o Faletagaloa, Matavai, Fatuvalu, Paia, Samauga ma Lefagaoalii.

O le vaiaso na sei mavae na faatautaia ai lea polokalame i le maota o Tugaga Tevise i Faletagaloa, e pei ona faailoa mai e le Matagaluega o Tina ma Tamaitai.

Na auai tinā ma tamā, tupulaga talavou, tamaitai ma taulelea faapea le fanau iti, aemaise i latou e i ai o latou manaoga faapitoa po o manaoga tumau, e molimauina lea faamoemoe. O le auga ma le faamoemoe o lea polokalame, ina ia tapena ma faamautu fuafuaga mo atinae o itumalo taitasi i totonu o le atunuu.

O le faagasolo o lea polokalame e na o se itumalo se tasi, ae o lo o faagasolo lava le Matagaluega ina ia soo atoa itumalo uma o le atunuu.

O le manulauti o ia fuafuaga ina ia faia ni komiti i totonu o itumalo latou te faatautaia a latou lava atinae e faailoa ai le vaega ua ave i ai lo latou faamuamua i vaega o le soifuaga.

E aofia ai le ola aoaoina lelei o fanau, soifua maloloina solitulafono ma le saogalemu, vaega o le tamaoaiga aua le manuia male sologalelei o le soifua i totonu o aiga o le itumalo.

I le folasaga a le Ofisa Sili Lagolago a le Matagaluega i le Vaega mo le Tamaoaiga, Afioga Nanai Sovala Agaiava na ia saunoa ai i le taua o le fai o sao o Itumalo mo le tapenaina o ia taiala, ina ia aumai so latou leo ma tuuina mai vaega o loo moomia le toe vaavaai atili iai.

O ia taiala ina ia mafai e Itumalo ona tagatagai agai iai le isi lima tausaga o i luma i lona atinaeina, o le faaopoopo lea a le Afioga i le Ofisa Sili Lagolago. “E le mo le Matagaluega, ae mo le atinae o Itumalo i totonu o le atunuu.” O manatu ma finagalo o le mamalu o le Itumalo, lea e fau agai ai taiala aua atinae mo le itumalo i le lumanai, aemaise o tupulaga faia’e o le atunuu.

E taua le iai o fuainumera faamaumauina e pei ona folasia i le folasaga a le Susuga ia Falesaopule Vaialia Iosua. “O numera o aiga i totonu o le Itumalo aemaise o numera o tina ma tamaitai, tama ma taulelea aemaise o alo ma tupulaga talavou o se afioaga poo se itumalo.”

Na saunoa faafetaia le Tuua o le afioaga o Faletagaloa le Afioga ia Tugaga Tevesi, e faafetaia ai le Matagaluega ma le Malo i lea polokalame matagofie. “O se polokalame ua leva na tatau ona faatino, aua o polokalame e manuia ai nuu ma le itumalo.”

Na saunoa foi Tugaga e faapea, o ni taiala e galulue faatasi ai e le gata o le Malo ae faapea foi itumalo taitasi, aua se lumanai manuia.

“Faafetai tele mo le polokalame matagofie ua maua ai le avanoa matou te faalogologo ai i mataupu e pei ona folasia e le Matagaluega.”

O le itumalo na sosoo ina ua maea Gagaifomauga Numera 2, na agai atu ailoaleMatagaluegaileItumaloo Gagaifomauga Numera 1.

© Samoa Observer 2016

Developed by Samoa Observer in Apia