E lē faigofie le soifuaga

By Admin Peršon 28 September 2017, 12:00AM

O le finagalo lea o Fitu Sefo, 36 le matua o e soifua i le Fofoga o Samoa e fa’apea ‘o le itu mautinoa lava e leai ma se isi o lo’o i le malo o iloa mai mafatiaga o lo’o feagai ma le to’atele o’i matou lima vaivai o lo’o i ai i aso uma.

O le taimi lenei e le’o i ai se to’alua ma le fanau ae o tupe o lo’o mafai ona ia mauaina o lo’o fesoasoani tele mo le aiga.

“Ia o a’u o lo’o galue nei i le kamupani a Ah Liki, ma o lo’o tele mai ai lava sina fesoasoani tele i le taimi lenei.

“I lo’u iloa i ai, e leai lava se mea o toe faigofie aua e o’o lava i auaunaga ia o lea lava ua amata maitauina le ta si’i uma i luga o tau o vaega nei.

“E o’o lava i tau o oloa e pei na taugofie i la aso, ia ua fai lava sina saosaoa i le taimi lenei ma o se itu fa’aletonu tele lea pe a o tatou va’ava’ai ai nei.

Na ia fa’ailoa o le tali lava o le taumafai lea e su’e se galuega mo le atina’e o aiga.

 “O le olaga ma le itu sa’o lava, ia a le tu i luga e alu e su’e se tupe e le maua se tupe.

 “O le tele o taimi e lelava ai ae ona o le manatu alofa lava i le aiga  aua  e leai ma se tupe ua teu ona o le leai o se tupe fa’asili mai galuega o lo’o faigaluega ai.

“E tasi lava le aso uma le tupe e mafai ona maua, e pei o lea lava le tulaga o lo’o i ai le taimi lenei.

“O lea le lelei o totogi ae pei e le umi se taimi e u’u ai lima ae ma’e’a.

Na ia fa’ailoa o le tele o tagata i le taimi lenei o lo’o ola i aitalafu.

“Ia masalo e leai lava ma se isi e le’o o’o ai lea tulaga, ua ola uma tagata i aitalafu ma e oti a le isi tagata o lae lava e tau totogi vaega nei.

“Ae pei e pau lea o le itu o lo’o mafai ona fesoasoani i le to’atele o tagata mo fanau aemaise o le atina’eina o aiga.

By Admin Peršon 28 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>