TALA FAASOLOPITO O SAMOA MAI LE AMATAGA-O LE ALA O LE ALOFA

By Fuimaono Na’oia Fasavalu Touli F. Tupua 30 March 2016, 12:00AM

O LE ALA O LE ALOFA

THE ROAD OF LOVING HEARTS

“Ua matou mafaufau i le alofa sili o Lana Susuga Tusitala i lana tausi alofa i le puapuagatia o i matou i le falepuipui, ua matou saunia ai se meaalofa ua sili e lē pala e o’o i le faavavau, o le ala ua matou elia. O i matou o: Lelei o Palauli, Mata’afā o Palauli, Salevao o Siumu, Po’e o Siumu, Telesō o Siumu, Tupuola o Lotofaga, Tupuola o Amaile, Muniaiga o Amaile, Ifopo o Lepa,Fatialofa o Lepa ma Lemusu o Solosolo. 

E faigofie le faaliliuina o ia upu, ae tatau ona faailoa atu- o upu ia e faamatala ai le soifuaga atoa Tusitala, e pei ona tusia e le atalii o lona uso o Graham Balfour. Ae o i latou ua faaalia suafa i luga na faa-falepuipui e Malo Tetele, ae sa mafai ona faauo ma Tusitala a’o avea i latou ma pagota. 

O le Ala o le Alofa pe o se kuata maila le umi, ae fai mai Tusitala-ina ua tatala aloa’ia lea Ala, fai mai Tusitala o le faaupuga a ia Tamalii, “ua matou lē faia lea ala mo se afe tausaga, ae i se tasi itu, e o’o lava lea ala i le afe tausaga. Ae o le taimi lava na mae’a ai ona fau lea ala, e uiga ese le tele o taavale sa faaaogaina. O le tele foi o tausaga, e faateleina pea tagata e savavali ai, ae faasaga isi e tanu ma faalelei atili ma faatumauina ai lava...

Ma ou te faamoemoe o le a manatua pea e o matou suli ma aiga i atunuu mamao lenei meaalofa ma faamanuia i latou sa tiga mo i latou i aso nei. 

Ma o le itu ia Samoa: “Ou te alofa i le atunuu” o le mau lea a Tusitala; “Ua ‘ou filifilia o ia e avea ma o’u nuu a’o o’u ola, ma fai ai lo’u tuugamau pe a ‘ou oti. 

Ma ou te alofa i ona tagata, ma ua ‘ou filifilia i latou e avea ma o’u tagata matou te nonofo faatasi ma feoti faatasi.” 

O “Vailima” poo le “Vila Vailima” e pei ona faaigoa ai nei, ua na o se fale faa-foliga i aso nei i lo le taimi na nofo ai lea Tusitala iloga o Sekotilani, talu ai ona ua faaopoopo i ai e lona pule fou se isi fogafale atoa ma le tele o isi lava suiga na fai i ai. 

Ae ui o lea, a silasila toto’a i ai se tasi, na te vaaia le tele o mea na faailoa mai ia i tatou e Tusitusiga i Vailima poo “Vailima Letters” A e asiasi i ai e te tu i totonu o se potu tele e fai ai faafiafiaga, lea e afua atu ai se fasitepu i le vaega i luga o le fale, ma e te manatua ai le anoano o faatasiga ma potopotoga uiga ese sa fai ai e pei o le aso fanau o Tusitala, o siva ma isi lava sauniga,o lona tuugamau ma isi lava vaaiga. 

O loo taatia mai ai i se vaega e lē mamao se malae lanu lauava, lea sa i ai se fale na nofoia muamua e le aiga, lea foi sa nofo ai sina toeaina tusiata o Joe Strong ma lona to’alua-o le tama teine lea a le to’alua o Tusitala o Isobel, a’o le’i tete’a. 

O le taoto mai o togalaau ma ona laufanua lanu lauava ua matua atoatoa ai le vaaiga matagofie. Fai mai na mua’i maua e le Kovana o Solofa le pule e faatau ai lea nofoaga e fai ma sui o le Malo o Siamani. 

O le tau o le fanua ma mea uma a Tusitala e i le va o le 3,000 na le 4,000 Pauni; na faatau atu ina ua maliu Tusitala mo se tupe e sili atu i le 2,000 Pauni; ae toe fai mai mulimuli ua 15,000 Pauni.

By Fuimaono Na’oia Fasavalu Touli F. Tupua 30 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>