Manatu o le Fa’atonu-Ta’ita’iga ma le mautali atu

By Seagaitumua Tupuola 30 March 2016, 12:00AM

E fo’i mai lava i lenei mea. Ona o le sauniga o le faatautoga mo Sui Usufono o le Palemene o se mea lea ua mamao ese atu ma le fiafia, ma le loto faanaunau na una’ia e le filifiliga a le Palemia o Tuilaepa Sailele Malielegaoi o Minisita o le Kapeneta lea ua faifai malie ona nimo atu, o se itu e talafeagai ai ona faailoa atu e faapea o le galuega a le Palemene ma le malo-ua mae’a ona faata’oto mo le isi lima tausaga. 

O le taofia o le tulai mai o se tulaga faigata i le faiga-palota-talosaga e faasino i ai i luma o le Faamasinoga Sli; ua tulaga saogalemu la ona faapea o Minisita o le Kapeneta ma Minisita Lagolago na tatou vaaia e o’o mai i le taimi nei o le a avea ma ta’ita’i o le malo mo le isi paeaiga.

O le Aso Tofi talu ai na toe faaopoopo ai e le Palemia lana vaega mulimuli i le faiga e ala i le faalauiloaina o ana Minisita o le Kapeneta e 13, ma faa-atoatoa ai le vaaiga i lena Kapeneta fou.

Ma ona o lea tulaga, o lea la ua o’o i le taimi e faatino ai loa le galuega talu ai le anoano o galuega e ao ina faatino. E ese ai mai le leo e afua mai le tuueseina o le Sui Palemia muamua, o Fonotoe Pierre Lauofo, e aliali mai e matua lautele le talia e Sui Usufono o le Palemene o tofiga i le Kapeneta.

O le ta’ua la o le sauniga o le faatautoga i le Aso Tofi, na toe faamamafa e Tuilaepa e faapea e matua taua tele le sailia o le paleni sa’o ma mautinoa e faapea o i latou ua filifilia-ua talafeagai e lagolago i le galuega a Minisita taitasi o le Kapeneta.

“E anoano auala e tautua ai i lo tatou atunuu- i le avea ma Minisita o le Kapeneta, Minisita Lagolago po e ala i le tele o komiti faa-Palemene e matua taua tele,” o le faaaliga lea a Tuilaepa.”

“O le filifilia o minisita lagolago, e taua foi ona fai ia mautinoa e faapea o a tatou filifiliga o le sui lea o se vaega tele ma le eseese, ae sa na faailoa foi uiga lelelei faale-tagata, tomai faapitoa ma le poto masani.”

Ae ui o lea, i le aotelega, sa ta’ua e Tuilaepa le taua o le sao o sui usufono ta’ito’atasi uma.  “Ae talu ai o le taimi muamua lenei ua tatou maua ai se vaega toatele uiga ese i totonu o le Palemene, o lea ua sili ai foi ona taua e faapea o le galuega a le malo e mulimuli i ta’iala tau faigamalo lelei,” o lana faaaliga lea.

“E tatau ona tatou siaki ia i tatou uma ta’ito’atasi ma fai ia mautinoa e faapea o le mea e talafeagai ma lelei mo Samoa o le mea lena e ave i ai le faamuamua. 

 “O i tatou uma lava o tagata soifua, o le mea lea e le mafai ai ona lelei atoatoa le Malo.

O le mea lea e taua ai ona ‘aua nei o tatou faatali  ae faaaoga fuafuaga uma tau faigamalo lelei ina ia mafai ai ona tatou tumau i le mautali atu ma ia tatou i luga pea o le ala o a tatou fuafua mo le atiina a’e o le atunuu ma le faaleleia atili o le soifuaga mo tagata uma lava.”

Ia- o se mea e faa-talitonu tagata, a ‘ea? Aemaise ai lava ona o le upu e sau mai le Palemia o Tuilaepa i le amataga o se paeaiga fou a le Palemene.  

Ua outou silasila la-o faiga-malo lelei e faatagaina ai se siosiomaga e mafai ai e Sui Usufono o le Palemene ma ta’ita’i ona fai le mea sa’o ma fai faaiuga sa’o.

O le mea moni, o le fai o filifiliga ma le mautali atu mo i latou i se faiga lautele ma le manino e una’ia ai le iloiloina ma le faamaoni  o filifiliga o loo feagai ma i latou o i totonu o taualumaga a le malo.

I se taimi e le’i mamao tele atu, o lenei tusitusiga na tuuina mai ai le fesili pe “faapefea ona avea ma taitai lelei-e tusa ai mai le vaai a nusipepa.”

Sa matou fai atu e faapea o le lu’itau aupito i tele o aso nei o le sailia lea o ni ta’ita’i e savali i le upu e tautala ai –ae le o le taitai e na ona fai mai o upu ona o le fia faailoa mai.  

A’o amata gluega a lenei fuaga fou o Sui Usufono o le Palemene, matou te talitonu o le upu sa matou fai atu ai i lena taimi e le mafai lava ona faaitiitia lona taua. Ia- e faapefea la ona maua se ta’ita’i lelei e tusa ai ma tatou fuafuaga? 

E faigofie lava, e tusa ai ma lo matou talitonuga. O se tagata lea e savali i le upu e tautala ai, o se tasi lea e matua popona i le faatinoina o le tele o fuafuaga lelei ma o tatou faamoemoega.

O lea itu e faasino i le mata’ituina, faamalosia o tulafono ma faiga faavae ua faata’oto ina ia mafai ai e tagata o loo fia manuia ona selesele i ona taui. 

E le o se mea lilo le faapea o loo ia i tatou le tele o tulafono lelei na tusi ma pasia e nisi o fai’ai e sili ona maoa’e na fai meaalofa mai ai le Atua i lenei atunuu. Ae peitai, o le a se lelei o nei tulafono pe afai e le o faafoeina ma usita’ia ma faamalosia?

E le faigofie ‘ea ona avea ia tulafono ma faamaumau taimi, maumau ai le malosi ma tupe? Matou te le tau faailoa atu ia te outou le mea o loo tupu i totonu o lenei atunuu i aso nei.

Ua outou faitau e uiga i le nenefu o le mea moni i totonu o nusipepa, faafofoga i ai i luga o le leitio ma afai e le lava lena mo outou tou te talitonu ai, o ata i luga o le Televise o loo faaalia ai se tala. 

O le mea moni- o loo tatou soifua i se taimi e matua lu’itau tele, o se vaitaimi lea ua faamaninoina e le tau o aso e le mautinoa, faafitauli, leai o ni avanoa, popole, mativa, fefe, sauaga ma faiga faamata’u o soo se ituaiga. 

O a mea o loo ta’u mai e nei mea ia i tatou? 

Latou te tautala i se ta’ita’iga ua maua o loo moomoo. Ma e le o faapito la matou la matou talanoa atu i le malo iinei. O lea matou te talanoa atu e uiga i ekalesia, nuu ma e o’o lava i o tatou aiga. O poutu nei ua iloa ai Samoa e pei ona i ai nei.

I se taimi e le’i mamao atu, e anoano faiga pi’opi’o sa faailoa mai faalaua’itele i totonu  o le pulega a le malo. O lenei tulaga ua ese ai lea mai le folafolaga a lo tatou malo tau le “mautali atu, faimea tonu ma faigamalo lelei.”

E leai se mautali atu poo se faimea tonu e tusa ai ma taupulepulega leaga ma taumafaiga na fai e puipui tagata o loo aafia ai. O le ta’ua faapitoa o tagata ta’ito’atasi na faaalia lo latou tetele i sea faiga sese e le o se faigamalo lelei lea.

Poo le a lava, o lena faiga o le aloa’ia lea ma le una’ia atili o faiga pi’opi’o. Tama’ita’i e ma alii, e lelei ona faamanatu ia i tatou e faapea o le faimea pi’opi’o e le mafai ona sui mai le ta’ele e tau i le tumutumu; e sui mai luga e alu i lalo.

O lona uiga-se’ia vagana ai ua sui ala o tatou ta’ita’i, o le a faauau pea faiga pi’opi’o  e faatama’ia le ola faale-agaga o lo tatou malo. 

Ma o se tasi o mafuaga ua sasao faa-afi ai le faimea pi’opi’o ona o lo tautala soo i le mea sa’o ona tuu ai lea iina. E tatau ona tatou faia nisi mea. A tatou talanoaina le mautali atu- e tatau ona tatou taofia o tatou ta’ita’i ina ia tali mai e tusa ai ma latou folafolaga na fai mai.  

Afai latou te folafola mai le faigamalo lelei, e tatau ona tatou maua se faigamalo lelei, e aunoa ma se isi lava mea i luma atu poo tua mai. 

O le Faimea Tonu e le o le faaalia lea o se lagona lelei ona o numera lelei na faasa’oina pusa ina ia maua ai se ‘cocktail party’ ae nana ai tua le mea e le moni o le olaga nei.

Matou te talitonu o le faimea tonu e mafai ona fai e taitai pe a lava lo latou lototele e ta’u ai le mea moni, faafeagai ma le mea moni-tusa lava pe tiga ma ta’uvalea ai i latou. O faigamalo Lelei e manaomia ai taitai faamaoni, ae le o le poto e fai polokiki. 

I Aso nei e ese ai mai isi lava asso, e manaomia e Samoa le silasila mamao, ta’ita’i e matata’u i le Atua lea na te una’ia suiga talafeagai e liua ai soifua mo le mea sili.

Ia tatou talosia le fuaga fou o ta’it’i o le Palemene faapea foi ma le faatulagaina fou o Minisita o le Kapeneta ma Minisita Lagolago, ia faamanuia atu le Atua. 

By Seagaitumua Tupuola 30 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>