Mana’omia se galuega

By Aruna Lolani 30 April 2017, 12:00AM

O le tamā ia Opeta Filipo e 38 le matua  o le soifau o Leauva’a o lo’o fa’alagolago tele ai lona aiga i le tele o vaega fa’atinoina aua le tausiaina.

E to’a fa le fanau ma o ia lava o lo’o fa’amoemoe ai tulaga tau aiga. 

“Ia e ta’utino atu lava o a’u sa faigaluega muamua, ma o lo’o fai nei la’u tama’i ta’avale la’u pasese ia ua alualu ou va’ai atu , e sili atu tupe e maua e tagata fai fa’ato’aga a lo matou nu’u nai lo a’u.

“E pei o lea le tulaga  na ou fa’amalosi ai lava lo’u nofo mai le galuega ae ou sau loa e galue le ‘ele’ele po o le a se tala.

“Ina ua maua le avanoa, ia na lagona lava le fiafia ina ua ou sau ma fai la’u ma’umaga ma amata na la’u e fa’atau ma ave nisi mo le aiga.

“Ua ou va’ai atu ia o lea lava a’u, o le ma’umaga lava le tali.

Na ia ta’ua o se fiafiaga i a te ia le usu i lona ma’umaga i taeao uma.

“E pei o le a le tele o fe’au o le aso o le  alu lava le ma’umaga e muamua lava ona alu i ai.

“E moe i le po ae mafaufau i talo o lo’o i le ma’umaga, aua o se fiafiaga lea i taeao uma o le usu atu ua ola lausiusi mai talo ma fa’i.

“O lo’u ia va’ai ai le taimi lenei, ia o lo’o mana’o e fai se fa’atoaga fuala’au ‘aina e moni lava o lo’o i ai nai kapisi ae o le agaga lava ia tele nisi vaega e totō aua e tetele fanua.

“O si o matou aiga fo’i e to’atele le aufaigaluega ia ae pei e i’u mai uma a latou tupe i la’u taga aua e fa’atau kapisi ma talo, aufa’i.

“Ia e tau mai fo’i le taeao nei ia o lo’o ua tulituli atu lava le paolo, ina ne’i te’i ua susulu malosi mai ae le’i uma fe’au o lo’o fia fai.

“Na faigata lava le taimi muamua , ia ae ua alualu lava e pei o se mea fiafia i a ta ita.

O nisi o fa’afitauli na ia fa’ailoa o povi o lo’o tele ina fa’aleaga ai le fanua.

“Ia e pei o lea le fa’afitauli i le taimi lenei, ia ma o lo’o taumafai lava i ai.

“Ona e le gata ina soli e povi talo, ia ae ai atu ai ma laufali ma nisi o vaega.

“Ae o le olaga lava ia ma le soifuaga o tua nei , ia o lo’o lelei ma atoatoa uma i le alofa ma le agalelei o le Atua.

“O le tausia ai o aiga o nisi ia o fa’amanuiaga.

By Aruna Lolani 30 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>