E mālie tele ma mata’ina gasologa o le Ta’amilosaga Ta’ito’afitu o le Sisigafu’a 2016. 

Fa’i o le fa’ate’ia o le to’atele i taunu’uga o le ta’amilosaga, a o le mau vevesi fo’i sa va’aia i luga o le malae ae maise fo’i la le ato-i-fafo o le siamupini talu ai o le ta’amilosaga. Ae na matua fa’afiafiaina lava le ‘Au-maimoa.

Momoli ai lava le fa’afetai tele ia Su’a Stephen Schuster ma lana Komiti Fa’afoe, ona o lenei fa’amoemoe ua taunu’u manuia, tumutumu ma fiafia le atunu’u fa’apea malo mai fafo.  Ioe, o le fa’ai’uga o le Ta’amilosaga, na sosola le BBE a Vaiala ma le Ipu ‘Autu o le Sisigafu’a 2016 – o latou fo’i sa sa’ili-siamupini i le Ta’amilosaga To’afitu o le Sisigafu’a a Tutuila ma Manu’a fa’apea le To’afitu a Malisi talu ai.

Na amata le ta’amilosaga i ta’aloga a ‘Au a Tama’ita’i, e le gata ina malie ae na mautinoa fo’i, ua le toe ta’ua nei le lakapi o se ta’aloga na o tama. O’o ane i ‘Au a Ali’i – ‘Au e lua na su’e siamupini i le Ta’ito’afitu a Malisi talu ai (Tabadamu ma Apia Maroons), lea na pa’u’u ifo i le vaega na sa’ilia le Ipu Mafolafola; ae mais fo’i le fa’aleaogaina o le siamupini talu ai i ‘Au a Tama’ita’i, le OZBOKETTES mai Ausetalia, lea na popo lelei lava e le NADI BLAZER mai Fiti, i le ta’aloga taufao i le sa’iliga o le siamupini i ‘Au a Tama’ita’i.

E le’i nofonofo lelei le ‘Au-maimoa i le Aso mulimuli o le ta’amilosaga. E le gata i la mata’ina o finauga a ‘au na o’o i luga, o le tele fo’i o isi vaega malie na va’aia ma fa’afiafiaina ai lava le ‘au-matamata.  

O nai vesiga a ‘au-ta’a’alo mai lea taimi i lea taimi, lea na va’aia ai nai faia’oga o taumafai malosi e tau-taofiofia isi mai le so’ona solia o le malae i taimi fa’apea o le vevesi o tama-ta’a’alo. 

A o le taualuga lava o le Ta’amilosaga atoa,  na sosola ma tama BBE, le Vaiala Blackie.

Na faia’ina ia Malisi St.Joseph mai Aukilani e 33 – 0, i le sa’iliga o le Ipu o le Ta’amilosaga Ta’ito’afitu a Malisi i le amataga o le tausaga nei, ae na tulua fo’i (Siamupii le Apia Maroons) i le Ta’amilosaga o le Fu’a a Amerika Samoa ma tonu ai loa i Tama o le Blackie, ua lava ia tulua.

O le taimi nei, i le Ta’amilosaga o le Sisigafua 2016, e le’i toe tulua le ‘Au a Vaiala, na siamupini. 

Moni e tele taimi o le ta’aloga o le su’ega-siamupini na sili ai ‘ai o Lauli’I (ina ua sikoa fa’alua), ae le’i fa’avaivai ai le finau a tama-Vaiala.

Na laualuga ia latou le faia’ina so’o i su’ega-siamupini, ma finau ai lava se’ia o’o ina mae’a le taimi, a ua sili o latou ‘ai, e 19 - 17.

O le faia’oga a Vaiala Blackie, le susuga a Stephen Betham na aupito sili ona fa’afiafiaina.

“’Ou te iloa o se manumalo mata’ina tele ma e ‘ave la’u fa’afetai ma le fa’aeaea i tama-ta’a’alo,” o lana fa’aaliga lea i se talanoaga ma sui o le Samoa Observer.

“Ua fa’atolu lea ona matou su’e-siamupini i Ta’amilosaga Ta’ito’afitu i lenei tausaga ma faia’ina uma ai i le ta’amilosaga i Tutuila ma le Fitu fo’i a Malisi, ma o se fiafiaga tele lea ia te a’u ma la’u ‘Au.

 “E momoli le fa’afetai i tama-ta’a’alo, sa koleni malosi ma fa’amaoni i vaiaso uma ma ua fa’amaonia lava lo latou naunau ia manumalo i le ta’amilosaga lenei o le Sisigafu’a.

“E momoli atu fo’i le fa’afetai tele ia latou uma sa lagolago mai, a matou pa’aga masani, le BBE, Budget Rentals, si o matou nuu pele o Vaiala ma tagata uma lava sa tapua’ia ma tu’i mai le mulipapaga ua i’u manuia ai le fa’amoemoe i lenei tausaga. 

“Momoli atu fo’i le fa’afetai fa’apitoa i le Komiti o le Tuto’atasi ona o le fa’atinoina o lenei ta’amilosaga. 

“E mulia’i ae le fa’aumatia, le fa’afetai mo isi ‘Au uma sa ‘auai i le ta’amilosaga; le ‘Au a Lauli’i, manaia le finau malo fo’i taumafai, e o’o i nai ‘Au mai Fiti, e ono malo lava so’o se ‘Au ‘ae ‘ou te matea, ona ua fiti mai fo’i le polo i la matou pito ma matou malo ai i lenei tausaga.” 

Na ioeina fo’i e le Faia’oga o Stephen le finagalo o isi faia’oga e fa’apea, o le ta’amilosaga aupito lelei lenei i lona tu’ufa’atasia, ua tele ai se suiga mai le tausaga ua mavae. 

 “Ua maualuga lava ma lelei le tulaga o le ta’aloga pei ona va’aia, ma o se tulaga lelei tele lea,” o lana fa’aaliga lea.

“Manaia tele le ‘auai mai pea o ‘Au mai Fiti fa’apea le ‘au mai Ausetalia. Ua matua finau ai lava le ta’amilosaga. 

“’Ou te manatu ua matua maualuga lava le tulaga o le lelei ua iai, mai lava i le Aso Faraile. A tilotilo fo’i i fa’ai’uga o ta’aloga, o le tele lava o ta’aloga e ‘ese’ese i le na o le lima ‘ai po’o le la’ititi ifo fo’i ma o le tulaga lea e fa’afetaia ai ‘au uma, aua o lea lava ua fa’ailoa mai i fa’ai’uga o ta’aloga. 

Na fautuaina malosi fo’i e Stephen Betham – o le sa fai ma Faia’oga o le Manu Samoa, tagata uma ina ia tutu-fa’atasi ma le Faia’oga o Damian McGrath ma tama o le ‘Au, a’o sauni atu mo le ta’amilosaga i Monacco.

“Tapua’i lelei ma alo mai e lagolago le ‘Au a le atunu’u,” o lana fa’aaliga lea.  

 “Ae maise le alo atu a le Manu Ta’ito’afitu, e sa’ili sona avanoa mo Ta’aloga a le Olimepeka. Tatou lagolago uma le tatou ‘Au i taimi uma a’o alofaiva.”

I’uga o le Ta’amilosaga:

(Ta’amilosaga a Ali’i)

• Ipu ‘Autu – B.B.E. Vaiala

• Ipu Mafolafola – Global Tabadamu mai Fiti

• Ipu Fa’a’ofu’ofu – Sasaai

• Talita – Aleipata

(Ta’amilosaga a Tama’ita’i)

• Nadi Blazers mai Fiti

(‘Au a A’oga Lalo o le 18 - Siamupuini)

• Kolisi Sagato Iosefo