Sainia le maliega a Samoa ma Iapani

By Fa’aliliu e Maiava 30 July 2016, 12:00AM

O le asō, e sainia ai e le Ali’i Palemia, Tuila’epa Sa’ilele Malielegaoi ma le Sui-Minisita o le Va-i-fafo a Iapani, o Masakazu Hamachi le maliega mo le Poloketi o le Nofoaga Tutotonu mo Suiga o le Tau i le Pasefika, lea e fa’atupeina e fesoasoani a le Malo o Iapani (Japan’s Grant Aid Assitance)’

O le poloketi e tusa lona tau ma le 23 miliona tala ($23,000,000.00)

Moni o lo’o sologa lelei pea atina’e tau-fa’ato’aga, o vaomatua ma faigafaiva fa’apea tagata tafafao mai fafo mo Samoa, ae o lo’o feagai pea ma lu’itau ona o le ‘uti’uti o tulaga tau-fefa’atua’iga ae maise le afaina so’o i fa’alavelave fa’aleNatura e pei o afa, lologa, mafui’e ma sunami fa’apea a’afiaga ona o fesuia’iga o le tau. O lona uiga, o le fa’aleleia o ia tulaga uma ma galuega tapenapena, o le tasi lea o fa’afitauli aupito taua e to’a ai le atina’eina o le atunu’u.  

O le fa’amoemoe ‘autu o le Poloketi, o le fa’aleleia atili lea o le Nofoaga ‘Autu e ala i le si’itia o tomai ma agava’a o atunu’u tau-atia’e uma o le Pasefika, i tulaga tau su’esu’ega ma le faia o faiga-fa’avae talafeagai. 

O lea nofoaga ‘autu, o le a fa’atuina i le nofoaga o fa’amautu ai le Vaega mo le Si’osi’omaga o le Pasefika (SPREP) i Vailima ma o le a galulue ai le tele o saienitisi ma latou e popoto fa’apitoa i le faia o su’esu’ega fa’apea ofisa o le a galulue fa’atasi ai mo le fa’amalosia pea o le tali atu a le motu uma o le itulagi, i a’afiaga ona o suiga o le tau.

O lea fo’i poloketi, o lo’o o-gatasi lelei ma fuafuaga fa’ataoto, o fesoasoani a le Malo o Iapani, e aofia ai “le puipuia o fa’alavelave ogaoga”, “le si’osi’omaga” ma “suiga o le tau”, lea sa fa’alauiloaina e le Malo o Iapani i le Fono Lona 7 a Ta’ita’i o Malo o le Pasefika sa faia i le 2015.

By Fa’aliliu e Maiava 30 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>