Ia galulue fa’atasi

By Ilia L Likou 30 September 2017, 12:00AM

O so’o se faiganu’u e ai le maopopoga o se faiganu’u manuia lea.

O lea le finagalo fa’aalia o le tamā i a Pese Vaiala, 60 le matua o Tafito’ala.

“Ia o lea lava le tulaga na i ai lava Samoa mai le amataga, e ala ona lelei so’o se fa’atinoga ona o le lelei o le maopoopoga o nu’u.”

“E le gata i lea o le malumaluga o le pulega a matai, ma o se itu  taua tele lea i lo’i iloa i ai.”

Na ia fa’ailoa o le tulaga lea o lo’o tele ina misi i le tele o alalafaga tu taulaga i Samoa nei.

“Ia e le tio nisi, aua o le faiga lava lea o le olaga o lo’o soifua ai nei o lo’o tele lava ina feafifio a’i solo le to’atele o  tagata ona o galuega ma nisi o tulaga.”

“Ae le uiga o la’u tala, e pei e lelei fo’i ona silasila ina ia fa’amautuina faiganu’u i le tele o afio’aga o lo’o i ai nei.”

“Aua e pei a maopopo faiganu’u o lena fo’i le ata e mafai ona va’aia i totonu o aiga aemaise augatupulaga fai mai.”

O lona finagalo o le tele o tupulaga talavou  o lo’o tula’i mai ai le tele o le mau fa’alavelave e mafua lava ona o le le usita’i aemaise ai le fa’aletonu o lo latou ola mai totonu o aiga.

“Ia o lo’u ia lea manatu i ai le taimi lenei, e pei  e ao lava ona va’ava’ai ai vaega nei, aua e pei lava o tupulaga o lo’o ua tele le ‘a’afiaga i le tele o le mau solitulafono i lenei vaitau.”

“A o tatou mafaufau i ai, a o’o ina matutua tupulaga o aso nei, ia o le a se ata va’aia i le lumana’i e o’o ai Samoa.”

O tupulaga o le lumana’i manuia.

“Ia o le tulaga ua tatou pepese ai, ae fa’afefea ona fa’atinoina, a mafai ona maua le maopopoga e tasi i faiganu’u ma aiga.”

“E le taumate le lumana’i manuia, o le uiga o la’u tala o le aganu’u ma le fa’akerisiano o vaega nei e lua e matua’i tele lava le sao i le atina’eina o nai fanau i le lumana’i.”

“O i latou e fa’aauauina le nofo lelei ai pea o le atunu’u mai lea aso i lea aso, ma o se itu lelei tele pe a va’ava’ai i ai.”

“Ia aofia uma nu’u ma alalafaga ta’itasi i faiganu’u ma pulega a matai.”

By Ilia L Likou 30 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>