Galue malosi mo le manuia o aiga
O Vouvili Taupo o se faifa’ato’aga e 53 tausaga mai le afioaga o Nofoali’i.
Na afea e le Fofoga o Samoa le tamā ia Vouvili o lo’o faia lana galuega i lona ma’umaga i Nofoali’i.
Na fesiligia le tamā ia Vouvili mo sona finagalo i tulaga o iai le soifuaga o Samoa i le vaitau lenei, ae na ia ta’ua ai, o lo’o sologa lelei lava mea uma i Samoa.
“E ese’ese lava manatu o tagata i lea tulaga. E iai lava i latou o lo’o fa’apea mai o lo’o sologa lelei pea le olaga, ae o lo’o iai foi lava nisi o lo’o fa’apea mai o lo’o faigata le olaga.
“Ae mo a’u lava ia, o le tagata lava ia e mafua ai ona faigata ma faigofie le olaga.
“Afai lava e te paie ma fa’atalatala, e faigata foi le olaga mo oe. Ae afai ete galue malosi o le a sologa lelei foi le olaga mo i latou.
“E leai lava se mea e maua ma le filemu i le olaga nei. E tatau lava ona galue ma le punoua’i ina ia manuia aiga.
“E fa’apena lava mo mea uma lava i le olaga nei. E mo’omia lava lo tatou galulue ae aua le nofoa’i. O le mea sili lava na e tatau ona fai, a le afu lava le muaulu e le maua se mea lelei mo aiga.”
Na ta’ua foi Vouvili, ua matagofie lava le atina’e o Samoa ua iai i le vaitau lenei.
“Ua manaia lava le atina’e o Samoa i le taimi nei. Ua solosolo lava i luma ma ua tele atina’e lelei mo aiga i Samoa.
“O suiga lelei e maua ai manuia lautele mo tagata o le atunu’u.
“E taua tele lea auā o lo’o aga’i i luma le olaga e lē fa’apea e tumau ai lava i se mea e tasi.
“E o’o foi i le fa’amanatuina o aso fiafia i lenei tausaga, ua matua’i manaia lava le olaga i lenei vaitau. Ua filemu lava ma tau leai ni fa’alavelave e tutupu i nei aso fiafia.”
Na ta’ua e Vouvili, o le mea lava o lo’o ave iai lana fa’amuamua o le tausiga ma le atina’eina o lona aiga.
“E pei lava o le to’atele o le mamalu o le atunu’u, o le naunautaiga lava ia manuia aiga ma atina’e ina ia sologa lelei pea le olaga o tagata ma manuia fanau.
“O si o matou aiga, e lima vaivai lava ma e fa’alagolago foi lava i le ma’umaga. A o’o lava ina fa’atau meamata, e maua lava le $200 i vaiaso uma. A tele foi talo e fa’atau ua tele foi le tupe e maua.”