Fia fa’aleleia auala

Tusia Ioana Tupa'i ,

76 Hits

Gagao’o Limu.

Gagao’o Limu.

O le tulaga fa’aletonu o le auala i Fagali’i-uta ua avea lea ma se faafitauli i se tasi o aiga.

O le susuga ia Gagao’o Limu, 54 le matua o le soifua  o Fagali’i-uta sa ia talosagaina matagaluega a le malo e gafa ma lea matafaioi ina ia faaleleia auala.

Na maua e le Fofoga o Samoa Limu o agai atu ai i lana faatoaga i le aso ananafi.

Sa ia faailoa o se faafitauli tumau lava lea e feagai ma lona aiga.

Ua 10 tausaga talu ona feagai pea ma lenei faafitauli ae leai lava se galuega o loo faia iai.

“I le sau ai mai luma ole maota o Malietoa, matuai leaga lava le auala.”

Na ta’ua e Limu o le tele o tagata ua agai e aumau i nofoaga o loo iai a latou faatoaga i le tausaga 2009 lea na aafia ai Samoa i le tsunami.

 “Ma ua avea lea ma tulaga ua tele na faaleagaina ai le auala ae o lea lava e leai se faatatau ua faia iai,” o lana saunoaga.

“O le itu e faapopoleina ai ona e iai foi nai isi faleoloa ma e ono avea lea ma tulaga e le ono o’o mai ai se kiliva ma aafia ai oloa a faleoloa e faatauina.

“Ou te talitonu foi o le a tele taavale a aiga o le a fa’aleagaina ona o le lē lelei o auala.

“I lo’u ia va’ava’ai atu ai o se itu faigata lava lea i lo’u iloa i ai, e leai lava se mea e mafai ona fai pe afai o lea lava le tulaga fa’aletonu o auala i le taimi lenei.

“O nai ta’avale ia e fai o le feoa’i ae ua vave tasui fo’i pa’u ona o le tulaga faigata tele ua o’o i ai le taimi lenei.

“O tupe uma lava mea uma, aua o tatou iloa uma a o’o ina tagi mai le ta’avale i se pa’u fou ia e taumafai lava ina ia fa’atino i le mafai e gata ai so’o se tulaga.

Na ia ta’ua o se itu e ao ona vave silasila i ai le malo mo lona fo’iaina.

“Ia e pei o lea lava le agaga maualuga i le taimi lenei o le mafai ai lea ona vave togafitia lea tulaga e pei ona tatou i ai.

“Ua le faigofie nei aso ae le itu taua o le mafai lea ona saogalemu auala o femalagaiga.

“O le itu mautinoa e fesoasoani le lelei o auala i le saogalemu o aso fai so’o.

© Samoa Observer 2016

Developed by Samoa Observer in Apia