Ia lototetele

Tusia Ioana Tupa'i ,

65 Hits

Ioane Paulo.

Ioane Paulo.

O se tasi o aiga i Aele e faalagolago i le fa’atauina o pinati aua le tupe fa’asili o lo latou aiga.

O lea le itu na fa’ailoa e Ioane Paulo, 61 le matua o le soifua.

Na ia faailoa e sili atu le tupe maua mai pinati nai lo latou e faifusiua ma faigaluega i ofisa.

“A o’o lava i le aso e selesele ai e $700 lava lau seleni e maua,” o lana saunoaga mai lea.

“O le toatele o tagata e le talitonu ia te au ae o nisi lava o vaiaso e o’o atu ai lava lau seleni maua i le $1000 aua e tele na alu lau kiliva nisi o faleoloa mo a latou oka.

E maua atu e le Fofoga o Samoa le tama o loo agai atu i Vaitele mo faatauaga aua le tausaga fou i le aso ananafi.

Na ia fa’ailoa foi o lana faatoaga pinati lava o loo faamoemoe i ai le tupe maua o lo latou aiga.

“O la’u fanau o loo aumau i Niu Sila ma e tele lava na fesoasoani mai ae le avea lea ma ala ou te faalagolago ai lava, ona ou te iloa e faigata foi le olaga o loo aumau ai Niu Sila,”

“O le tupe lava e faatino ai mea uma i la atunuu ese e mafai ai fo’i ona faatino ai a tatou faatoaga e saili ai se tupe pe a manaomia.”

“E moni lava e le faigofie lenei olaga ae le faapea ua a’afia ai a’u ma lou aiga.”

“Ou te iloa foi e tele lava faafitauli o loo alia’e mai ae le avea lea ma tulaga e pagatia ai pe avea ma ala e taotaomia ai le tagata.”

“E sa’o ua taugata le soifuaga ma ua o’o lava i se tulaga ua le mafai ona gafatia e o tatou tagata.

“Mo au lava ia e leai se mea o le a ou faasea ai aua o a’u lava ia ou te le faigaluega ae o loo tausi lou aiga e ala lea i le faatauina o pinati.”

“E le o se galuega faigofie, ou te faiatu lava au e le faigofie le faamamaina o le fanua ma le totoina o le pinati.”

“Na o’o mai ai lea i le fia masina e faatali ai seia oo lava na mafai ona faatauina atu.”

“O le seleni e maua mai e faasoasoaina lea i mea fai a le aiga, Ekalesia ma le nu’u, o le seleni e totoe ai ona faasoasoa loa lea i le tausiga o le aiga ma e lava ma totoe.”

“Ou te talitonu o le galue malosi ma faamaoni e mafai ai ona foia le tele o faafitauli e ono feagai ma le tagata.”

© Samoa Observer 2016

Developed by Samoa Observer in Apia