Talosagaina le mālo mo se matou taligalu

By Fetalai Tuilulu’u 31 March 2017, 12:00AM

O so’o se gataifale lava o Samoa e ao lava ona fa’alelei ma ave iai le fa’amuamua ina ia fausia lelei ma fa’amatagoife. 

O le gatataifale foi o se vaega e sili ona taua i tagata o lo’o nonofo latalata, pei na taua e le tamā ia Toni Sū Namulaulii mai le afioaga o Lauli’i ina ua maua ai le lā fa’atalatalanoaga ma le Fofoga o Samoa le aso ananafi. 

“O lo’u lava ia manatu fa’alia, o le aoga o atina’e i si o tatou atunu’u ua alualu ai luma le tamaoaiga. 

“Ua vaaia le matagoife o auala, mautū faleaoga, o falema’i o le malaeva’alelei ae tasi lava le tulaga o lo’o misi. 

“O le fa’aauauina o le fausiaina o tailagu. 

“Pei ona e ataga’i mai ai, ua matua leaga fai lava e gataifale o na o le lē faia se taligalu i nei. 

“Ua tou tagataga’i le maualuga o le sua le sami, ma le malolosi o galu ua tauau na ave ese atu ai le tele o le oneone ma le palapala ma o’o ai lava na latalata mai i uta o matou fale. 

“O lea lā e talosagaina ai lava le mālo ina ia taga’i mai lea tulaga, se faia se taligalu e taofi mai ai le sua tutu’i o le sami ma fa’aleagaina ai lo matou gataifale. 

“O le tulaga foi ua iai nei le sua le sami ua fai lava sina malosi ma le ala foi lea o le fia faia ai le taligalu.  

Sa fa’ailoa lava le tamā lona naunau ina ia faia se taligalu le latou nu’u se taimi vave. 

“Ua leva tele na talosaga le matou taligalu ae lei tali mai lava le mālo, aisea e faigata ai na Iloilo lenei mataupu, ae o lo’u iloa lava iai o lo’o tele le tamaoaiga o Samoa. 

“Ou te ta’utino atu foi ua lelava taliga e fa’alogo nei fa’aupuga o le mea lelei ai Apia e lelei foi mo nu’u. 

Aisea ua le tausisi ai le mālo i upu nei? Aisea e le savali ai nei fa’amatalaga. 

“Ou te iloa foi le to’atele o tagata o lo’o fesoasoani mai si o tatou atunu’u aisea e le maimaua mai ai se $20,000 e faia ai se matou taligalu aua foi o ola o tagata ae maise o fanua o le mafauaga o le fia fai o se taligalu. 

“Mo le silafia sa talosagaina lava le mataupu ma o lea foi ou te manatua lelei lava o le fa’agaioina le taligalu i Apia o nei lava si o matou nu’u sa avatu ai le oneone. 

“Ou te ta’u atu foi e $5 le tau o loli oneone sa fa’atauina atu ai le oneone e faia ai le taliagalu. 

“O le a le faigata le faia o si o matou taligalu? 

By Fetalai Tuilulu’u 31 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>