“E le o matou o ni tagata fa’atupu-fa’alavelave”

By Fa’aliliu e Maiava 31 May 2016, 12:00AM

Ua fa’ailoa mai e se tagata Mosalemi, ua asiasi so’o mai i Samoa e fa’apea, e le o Mosalemi uma o ni tagata fa’atupu-fa’alavelave.

O saunoaga a Mustenser Qamar – o se tasi ua fa’aalia so’o ona finagalo i tusi e ‘auina mai i le Fa’atonu o le Samoa Observer e uiga i tu’ua’iga sese ua faia fa’asaga i le fa’atuatuaga Moselemi, sa tali mai i se fa’asalalauga e le’i mamao atu e fa’apea, o le a fa’asa le Isalama i totonu o Samoa nei. 

O ia o se ta’ita’i o le fa’atuatuaga Mosalemi na fa’au’u mai le A’oga Fa’afaife’au Isalama ma Ekalesia Fa’apea i le Malo o Peretania. O i’ina sa avea ai o se fa’amasino masani mo le polokalame o le TV e fa’aigoaina o le “moli fa’ailoilo o le mea moni”, lea e le faia ai e Mustenser ni faiga fa’aitu’au o lana ekalesia ma le fa’atuatuaga fa’aMosalemi.  

Ae le o malolo ai pe fiu Qamar e fa’amalamalama i le afe ma afe o tagata o lo’o talitonu sese ma tu’ua’ia  lana lotu ma le fa’atuatuaga. Latou o lo’o tau-mulimuli pea i upega-taga’iLagi i lana Tusifoliga.

 “E silia i le 99 pasene o Mosalemi i le lalolagi, e matua leai lava ni o latou so’otaga ma vaega fa’atupu-fa’alavelave ma o lo’o latou fetu’uina fo’i a latou gaioiga o faia nei,” o lana fa’aaliga lea i le Samoa Observer.

“ E moni o lo’o tuli-‘aupuina pea tagata Mosalemi ona o lo latou talitonuga ma o lo’o sulusulu solo i isi vaega o le lalolagi mo se lavea’i ma sosola ‘ese ai fo’i mai osofa’iga fa’atupu-fa’alavelave nei. O tagata fa’atupu-fa’alavelave nei o lo’o taumafai lava e fa’aseseina ma faia mea e tu’ua’ina ai fua le matou fa’atuatuaga ina ia ‘ausia ai o latou mana’oga o polokiki fa’ava-o-malo.” 

Na fa’aopoopo mai fo’i, o se fa’ai’uga mo lea fa’afitauli ogaoga e le o malamalama ai le to’atele, “O le Isalama e le o se fa’amata’u, a o mafaufauga ma talitonuga ogaoga ua avea ma pogai ‘autu o le tele o le vevesi. Ae po’o a lava talitonuga, e tatau ona tatou tutu-fa’atasi e tete’e faiga nei ma galulue mo se fofo lelei. O le faia o nisi talitonuga ma le fa’atu’i’ese e le o le tali lea o le fa’afitauli.” 

Ina ua fa’afofoga i tala ua salalau nei fa’apea o le Isalama o se fa’amata’u i tagata Samoa, na matua ofo lava Mustenser Qamar, o se tasi ua asiasi so’o mai i Samoa nei, ma e le’i te’i ai, a ua popole lona loto. 

 “O mafaufau nei e foliga ua fa’asala’ese mai a’oa’oga alofa ma le filemu a lo Tatou Ali’i o Iesu, (Ia tumau ia te Ia le vi’iga). O le ekalesia o se mea e mai le fatu ma ‘ou te toe fa’amanatu atu lava, e leai se Ekalesia e a’oa’oina se feitaga’i ma ni faiga-saua fa’atupu-fa’alavelave. Ua matua ‘ave-seseina lava la matou ekalesia ma le fa’atuatuaga, ua nunumi fa’asoloatoa fuaitau ogaoga ma mea sa tutupu, ua fa’atele ma saga fa’alautele atu i le tulaga ua matua le-manaia ai lava. Sa ‘ou a’oga i le Ekalesia ma le Fa’atuatuaga Isalama ma ‘ou te talia ma le agaga fiafia, se talanoaga fa’alaua’itele e fa’amaonia ai, o le lotu Isalama, o se ekalesia e fifilemu”. 

O le vaita lea, sa ia ta’ua ai le Ta’ita’i o Ekalesia i Samoa nei. Na amata le finauga lenei e le Failautusi Aoao o le Fono a Ekalesia So’ofa’atasi, le faife’au o Ma’auga Motu, lea na saunoa e tete’e le lotu Isalama ma Samoa nei.

 “’Ou te tatalo i Ta’ita’i o Ekalesia, fa’amolemole, ‘aua ne’i galo le aia fa’aleTagata ma le sa’olotoga i talitonuga. ‘Ou te fautua atu fo’i, o a’oa’oga moni lava fa’aIsalama, e filemu ma o a’oa’oga nei o lo’o talia ma mulimulita’i ai le to’atele o Mosalemi. O nei fo’i a’oa’oga e le na o se mea e fa’auigaina, ae a manana’o ta’ita’i e talanoaina fa’alaua’itele, e mafai ona matou fa’amaonia e ala i a matou a’oa’oga ma talitonuga.” 

Ae moni, sa fa’ailoa manino lava e Mustenser Qamar, le fe’au fa’aleAgaga a le talitonuga fa’aIsalama ma le Kerisiano, e matua leai se ‘ese’esega e pei ona manatu ai le to’atele.  

 “Matou te talitonu sa ‘auina mai e Le Atua Perofeta i le lalolagi e ta’ita’i tagata ma fa’amanatu iai le alofa ma ia tapua’i i Le Atua, ma ia tau-mamao ‘ese ma fa’aosoosoga a le tiapolo o le lalolagi. Mai lava i le taimi o Atamu, sa ‘auaina mai lava e Le Atua perofeta i le lalolagi e aofia ai perofeta o le Tusi Pa’ia e pei o Noa, o Apera’amo, o Mose ma isi.  

 “O le talitonuga lena e o fa’atasi ma le talitonu fa’aKerisiano. Pau lava le ‘ese’esega ona matou te talitonu o Iesu Keriso o se tasi e alofagia ma o se perofeta e alofa iai Le Atua. Matou te talitonu, e tusa o a’oa’oga a le Tusi Pa’ia ma e mo’omia le taimi, na ‘auina mai e Le Atua Silisili’Ese le Perofeta o Moameta (Ia Vi’ia o Ia) i le Seneturi Lona 6 ma fa’apea ai lava ma fa’aauau ona ta’ita’ia le tagata soifua ina ia fa’asaga atu ia te Ia, Na o Ia lava”, o lana lea ‘oto’otoga o ona talitonuga fa’aIsalama. 

Na fesiligia e uiga i tulafono tau-fa’atupu fa’alavelave lea ua luluina ai le fa’avae o le filemu i totonu o Europa, ae toe fa’ailoa mai fo’i e Mustenser Qamar e fa’apea, so’o se Mosalemi lava i le foga’ele’ele lenei, e ao ona sa’ili le mea tonu e tatau ona fai, e fo’ia ai ma fa’auma soligatulafono o faia nei fa’asaga i tagata soifua.  

 “O se fesili taua tele lenei; se fesili e tatau ona fesili ai lava so’o se Mosalemi, ia te ia lava. Ua tele le mau fa’alavelave ma fasiotiga-tagata ua faia i le lalolagi nei ma e fa’anoanoa ai lava, ona o nisi o nei fa’alavelave o lo’o fa’atinoina lava i le igoa o lo’u fa’atuatuaga ma la’u lotu, la’u perofeta pa’ia.

“E mafai ona ‘ou fa’apea atu, o le matou fa’atuatuaga, le Ahmadiyya Mosalemi i le Lalolagi Aoao, matou te fetu’uina malamalama lava nei mea uma e tutupu mai. E le gata matou te matua te’ena nei faiga fa’aterorisi, ae o lo’o matou finauina fo’i mafaufauga nei e ala i tusitusiga ma talitonuga e fa’amaonia  i mau mai le Tusi Pa’ia, ma matua te’ena ai talitonuga sese nei, e le o ni talitonuga fa’aMosalemi.”  

Ae le uma ai lava finauga e fa’amuta ma taofia faiga fa’aTelorisi, pei ona fa’amatala e Mustenser, o le a’oa’oina lelei lava le ‘autu ma le tali e finau ai mo le taofia o faiga fa’atupu-fa’alavelave. 

 “O le ‘auala tonu lava lea e momotu ai le ‘autu ma le pogai o le fa’afitauli. Ua tatau lava ona fa’atino i le lalolagi atoa, ni a’oa’oga fa’asemina, o fonotaga fifilemu, o tautalaga i totonu o a’oga ma iunivesete e a’oa’o ai e le gata o o tatou sui ae fa’apea fo’i ona pupuni ai le va o le le-malamalama o isi. Tatou te le-mo’omia ni faiga fa’aItu’au ae ao ona a’oa’oina tagata e le o ni Mosalemi ma fa’amalamalama iai talitonuga uma ma a’o’aoga e tatau ona silafia ma iloa.” 

Na ta’ua e Mustenser Qamar, i totonu o Peretania lava ia, e silia i le faselau-afe pauni Peretania (pe silia i le tasi-tesi-lima miliona tala) tupe e sa’ilia e Fa’alapotopotoga a ‘Autalavou Mosalemi mo fa’alapotopotoga e mo’omia fesoasoani i Peretania e aofia ai Vaega o Su’esu’ega o le Kanesa ma le Koluse Mumu a Peretania.

 “Pei lava fo’i o Amerika, o Niu Sila ma Ausetalia ma le lalolagi aoao, e a’afia tupulaga uma i se fa’atinoga maumaututu lelei e fa’aalu ai o latou taimi. Matou te tufatufa atu fo’i tusitusiga i le lalolagi e fa’ailoa iai va’aiga sese ma talitonuga sese o le lalolagi ua tilofia ai le fa’atuatuaga Mosalemi. I le 2014, sa ‘ou ‘auai i se taumafaiga i Sepania, o a’u o se tasi o tagata e 21 sa ofo atu lou taimi e tufatufaina ai le toluselau afe o fa’amatalaga e finau ai ma te’ena va’aiga ma talitonuga sese fa’asaga i le fa’atuatuaga Mosalemi,” o le fa’amalamalamaga lea a Qamar. 

Ua silia i le 1.6 piliona sui o le fa’atuatuaga Isalama i le lalolagi atoa, ma ua avea ai o le ekalesia lona lua le to’atele o ona sui, e pito i Ekalesia Kerisiano. Ae pule lava Sitafune i la o lona va’a, e fa’amasino fa’soloatoa ai tagata soifua uma ona o tu ma aga ma talitonuga a se vaega to’aitiiti o lo’o fa’aaogaina le igoa Isalama e fa’alauiloa ai se fe’au e fa’apopoleina ai ma fa’afefe le lalolagi. 

By Fa’aliliu e Maiava 31 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>